Атырауда үйлердің біріне қарумен басып кіріп, үй иесін ұрып-соғып, ақшасы мен заттарын тартып алған қарақшылар ұсталды.
Бұл туралы облыстық полиция департаментінің баспасөз қызметі хабарлады. Баспасөз қызметі қалалық Полиция басқармасының 102 арнасына Атырау қаласында орналасқан көп қабатты үйлердің бірінде уақытша тұрып жатқан1986 жылы туған Шымкент қаласының тұрғыны қоңырау шалып, шағым түсіргенін айтады.
«21:40 шамасында белгісіз екі ер адамның заңсыз кіріп, асхана пышағымен және қаруға ұқсас затпен қорқытып, ұрып-соғып, “Айфон 6с”, “Samsung” маркалы ұялы телефондарын, “Apple Watch” маркалы смарт қол сағатын, екі дана алтын сырғасын, 40 мың теңге ақшасын ашық түрде тартып алып және 1 млн. 576 мың теңге көлеміндегі ақшасын, ұялы телефондағы “Каспий” қосымшасы арқылы басқа есеп шотқа аудартып алғандығы жөнінде хабарлама берді Оқиға орнына дереу жеткен Криминалдық полиция бөлімінің жедел уәкілдері мен Батыс-18 қызметкерлерімен жедел іздестіру шараларын жүргізу кезінде екі күдікті ұсталып, олардан екі дана ұялы телефон, екі дана алтын сырға, бір дана смарт қол сағаты, пневматикалық қару мен 1 млн. 14 мың теңге көлемінде ақша тәркіленді» делінген хабарламада.
Аталған дерек бойынша ҚР ҚК-нің 192-бабының 3 бөлігімен қылмыстық іс тіркеліп, екі күдікті уақытша ұстау изоляторына қамауға алыныпты, тергеп-тексеру жұмыстары жүргізілуде.