Атырауда өзгенің көлігін заңсыз айдап әкеткен 24 жастағы азамат бақылау камерасы арқылы анықталды. Бұл туралы Атырау облыстық полиция департаментінің баспасөз қызметі хабарлады.
4 қараша күні сағат 12:22 шамасында 102 операторына 28 жастағы азаматша қоңырау шалған. Сол күні ол сағат 11:20 шамасында белгісіз адамның Момышұлы көшесіндегі емхананың алдында тұрған “Toyota Highlander” маркалы автокөлігін заңсыз жүргізіп кеткендігі жөнінде хабарлайды.
Хабарлама бойынша жедел басқару орталығының және патрульдік полиция қызметкерлерімен жедел іздестіру жұмыстарын жүргізу кезінде “Toyota Highlander” маркалы автокөлігі Уалиханов көшесінің бойынан тоқтатылып, көлікті заңсыз жүргізіп әкеткен 24 жастағы қала тұрғыны ұсталды.
Аталған дерек бойынша ҚР ҚК-нің 200-бабының 1-бөлігімен (Автокөлікті заңсыз айдап әкету) қылмыстық іс қозғалып, тергеу амалдары жүргізілуде.
