Отандық БАҚ: кешеден – келешекке

АTPress.kz. 21 желтоқсан. Бұқаралық ақпарат құралдарының келешегі мен тәуелсіздік жылдарында жеткен белесі Атырау қаласында болған БАҚ өкілдерінің конференциясы барысында айтылды.

Мұнайлы өңірге табан тіреген республикалық, облыстық басылымдардың бас редакторлары кеше Атырау облысының әкімі Нұрлан Ноғаевтың қабылдауында болып, өңірде заман талабына сай жұмыс атқарып келетін нысандарды аралаған еді. Бүгін «Атырау-Ақпарат» ғимаратында болып, өңірдегі екі облыстық, жеті аудандық газеттердің шығу тарихымен, типография тынысымен танысты.

- Газет шығару процесін алғаш рет көруім.  Типографияның жұмысын көру бүгін мен үшін қызықты дүние болды, - дейді  «Хабар 24» арнасының директоры Арман Сеитмамыт. 

«Renco» қонақ үйінде болған «Отандық БАҚ: кешеден – келешекке» атты бас редакторлар диалогында журналистикаға өмірін арнаған азаматтар баспа БАҚ-ның өміршеңдігі жайында әңгіме қозғады. Журналистер қауымы оқырман сұранысын қалай қанағаттандыру керектігі туралы маңызды ақпараттар да осы басқосуда айтылды. «Атырау-Ақпарат» ЖШС-нің директоры Ерболат Қаменов, журналистер одағы Атырау облыстық филиалының төрағасы Қуандық Батыров республикадан келген делегацияға Атырау журналистикасының тынысы жайында мағлұмат берді.  

- Атыраудағы екі күндік конференциядан алған ой көп. Отандық БАҚ дегенді бүгінгі күнмен ғана шектемеуіміз керек. Біздерге кешегі «Сахара», «Айқап» журналдарының үлгісін алатын кез келді. Атырау облысының ақпарат саласына көп жағдай жасалғанын көзіміз көріп отыр. Шығармашылық табыс тілейміз, - деді «Қазақ газеттері» ЖШС-нің директоры, редакторлар кеңесінің төрағасы Жұмабек Кенжалин. 

«Түркістан» газетінің бас редакторы Шамшидин Паттеев газет оқымайтын, ғаламтор беттеріндегі қысқаша ақпаратқа үйір жастар ертең қысқа ойлап жүрмесе деп налитынын білдірсе, «Қазақ әдебиеті» газетнің бас редакторы Жұмабай Шаштайұлы отандық газеттерде сыншыл ойдың кенжелеп келе жатырғандығын сынға алды. 

Бас редакторлар диалогы барысында сөз алған республикалық «Айқын» газетінің бас редакторы Нұртөре Жүсіп: «Мемлекет басшысының БАҚ өкілдеріне арнап президент сыйлығын тағайындауының өзі журналистердің қоғамдағы беделін айқындай түседі. Сондықтан баспа БАҚ пен электронды БАҚ екеуі құстың қос қанатындай қатар жасай береді», - деп түйіндеді сөзін. 

Конференция қонақтары шара соңында Ерлан Сыдықов пен Әбілсейіт Мұқтар құрастырған «XVII-XIX ғасырлардағы қазақ хандығы» кітабының таныстырылымын тамашалады. 

Нұрбейбіт Нұғыманов

Сурет Әнуар Әбілғазиевтікі