Халықаралық сыбайлас жемқорлыққа қарсы күрес күніне орай көрме ұйымдастырылды, деп хабарлайды AtyrauPress тілшісі.
Көрмеге атаулы күнге орай жас суретшілер арасында өткен республикалық байқаудың жеңімпаздарының туындылары қойылды. Бұл туралы Өңірлік коммуникациялар қызметі мәлім етті. Байқау нәтижесіне сәйкес, жүлделі үшінші орынды Алматы облысына Аят Өркен, екінші орынды Ақтөбе облысыың тұрғыны Мейрамбек Малдықұлов қанжығалады. Ал бірінші орынды Қызылорда облысының суретшісі Әлішер Жүргенов иеленсе, сайыстың бас жүлдесі Батыс Қазақстан облысының намысын қорғаған Айнұр Бекниязоваға бұйырды.
- Республикалық байқауға 7 облыстан 25 өтінім түсіп, 19-ы іріктелді. Үздіктерді ҚР суретшілер одағының мүшелері, арнайы мамандардан құрылған комиссия анықтады. Қатысушылар 18 жастан асқан, кәсіби қылқалам шеберлері. Біздің мақсатымыз – жастарды өнерге тарту, қызығушылығын арттыру. Сондай-ақ, көрмеден бөлек, суреттерді әлеуметтік парақшаға жүктеп, көрермен санын арттырғымыз келеді, - деді облыстық халық шығармашылық орталығының басшысы Жәнібек Аманиязов.
Байқаудың бас бәйгесін қанжылаған Айнұр Бекниязованың айтуынша, ойын сурет арқылы астарлап жеткізгісі келген.
- Туындымның атауы - «Сызат». Шаңырақ – қазақтың байлығы, отбасының беріктігі. Оны тіреп тұратын уық әділдік пен бірліктің белгісі. Жыланның бейнесі бүгінде белең алған жемқорлық деген мағынаны білдірді. Мұндағы ойым – ел арасында белең алған жемқорлықтың қоғамға қалай әсер ететінін жеткізу, шаңырақтың қалай шайқалатынын көрсету, - деді А.Бекниязова.
Сәуле МАҒАУ
