Ауданның 80 жылдығына орйластырылған ақындар айтысына Қызылорда, Ақтөбе, Маңғыстау, БҚО және Атырау қаласы мен аудандарынан келген 12 ақын қатысты, - деп хабарлайды Өңірлік коммуникациялар қызметі.
Келелі сөз бен кестелі ойды өлең жырмен жеткізетін жыр сүйерлер «Қызылқоға – құт мекен» атты додада бас қосты.
Жыр додасын ҚР мәдениет саласының үздігі, айтыскер ақын Шалқарбай Ізбасаров тізгіндеді. Ал, қазылар алқасына Қазақстан Жазушылар одағының мүшесі, Қызылқоға ауданының Құрметті азаматы Мереке Құлкенов төрағалық етті.
Айтыстың бас жүлдесі ақтөбелік Нұрбол Жауынбаевқа бұйырса, I орынды исатайлық Өнербек Дәулекенов, II орынды қызылқоғалық Батыржан Кәдірбай иеленді. Ал, III орын БҚО келген Талғат Мықи, қызылордалық Бексұлтан Орынбасаров пен Ернұр Исахаевқа бұйырды. Сондай-ақ, Бимырза Әбілқайыр мен Марсель Ерсайнов қазылардың арнайы жүлдесіне ие болды.
- Осы айтысқа бір ай дайындалдым. Миялы өңірі мен ден зиялы тұлғаларды зерттеп, бүгін тілге тиек еттім. Кімнің бас жүлде алғаны маңызды емес. Басты мақсат халықтың рухын көтеру, жігер беру,- деді Нұрбол Жауынбаев.
Жеңімпаздар мен қатысушыларға ақшалай сыйлықтар табысталды.