Елтайлықтардың тәуелсіздікке тартуы

ATPress.kz. 16 желтоқсан. «Елтай - сүйікті ауылым» Индер ауданы Елтай ауылының тәуелсіздікпен құрдас жастары туған жеріне деген сүйіспеншілігін осындай көрнекілік билборд арқылы жеткізді.

Құны 300 мың теңге тұратын көрнекілікті 1991 жылы туылған 25 азаматы бірігіп, ауыл орталығындағы мәдениет үйінің алдына орнатқан. 

«Оқып жүрген кезімізде тәуелсіздіктің құрдасы ретінде мейрам сайын сыйлық, марапатқа ие болатын едік. Ер жетіп, енді тәуелсіздікке қандай сый жасасақ деп кеңескенімізде осындай ой келді. Оған ауыл әкімдігі де келісімін беріп, түнде жарықтандырып тұруға мәдениет үйі әкімшілігі көмектесетіндігін айтты. Бұл тәуелсіздік құрдасы ретінде ауылдың көркеюіне қосқан шағын үлесіміз. Туған жерге деген сүйіспеншілікті жеткізу үшін ақшаның маңыздылығы жоқ, көңілдің тазалығы болса жетеді», - дейді тәуелсіздік құрдасы Сабыржан Қабдолов. 

Елтай ауылынан түлеп ұшқан тәуелсіздік құрдастары бүгінде өнер, мәдениет, мұнай саласында, бірқатары қарапайым жұмысшы болып әр жерде қызмет жасайды. Жастардың тәуелсіздік күніне орай жасаған тартуы қазір әлеуметтік желі қолданушыларының талқысына түсіп, өзге де ауыл жастарының қызығушылығын оятуда. 

Нұрбейбіт Нұғыманов

Сурет Жанай Амантурлиннің Фейсбуктегі парақшасынан алынды