Бес театрға да бас жүлде

ATPress.kz. 1 желтоқсан. Атыраудағы дәстүрлі екінші Халықаралық театрлар фестиваліне қатысқан бес театр да бірінші орынға лайық деп танылды. Әр ұжымға 500 мың теңгенің сертификаты табыс етілді.

Атырау облысы әкімдігінің қолдауымен өткен өнер кешіне Қырғызстан елінен, Павлодар, Батыс Қазақстан облысы театрлары мен Оңтүстік Қазақстан облысынан өзбек драма театры және Махамбет атындағы Атырау облыстық драма театр ұжымы қатысып, төрт күн бойы халыққа әсерлі өнер кешін сыйлады.  

- Театрға мұнша халықтың жиналуының өзі үлкен той. Әртістер бізге әсерлі шабыт сыйлады. Бір театр режиссёрімен озық көрінсе, бірі драматургиясымен, енді бірі сахна шеберлігімен бір-бірінен асып түседі. Сондықтан, қазылар алқасы ақылдаса келіп, театрлардың барлығын бірінші орынға лайық деп санап отыр, - деді қазылар алқасына төрағалық еткен Қазақстанның халық әртісі, мемлекеттік сыйлықтың иегері Асанәлі Әшімов. 

Кеш барысында Қазақстанның әр өңірінен және Ресей, Қырғызстан, Германия елінен келген азаматтар Рахымжан Отарбаевтың иығына шапан жауып, құттықтау лебіздерін білдірді. Ғ.Сланов атындағы облыстық кітапхана ұйымдастырған көркемсөз оқу шеберлерінің Рахымжан оқулары облыстық байқауы да осы фестиваль аясында қорытындыланды.  

Салтанатты жиында құттықтау сөз алған Атырау облысының әкімі Нұрлан Ноғаев: 

- Биылғы фестиваль Қазақстан Республикасының тәуелсіздігінің 25 жылдығымен, жазушының 60 жасқа толу мерейтойымен және Тұңғыш президент күнімен тұспа-тұс келіп отыр. Драматург, режиссёрдің айтқысы келген ойын көрерменге сол қалпында жеткізу үлкен шеберлікті талап етеді. Театрлар оны кәсіби деңгейде алып шықты. Рухани байлықты кеңейтуге арналған игі шаралар Атырауда алдағы уақытта да жалғасын табады, - деді.

Жиын соңында жазушы Рахымжан Отарбаев: 

- Мен мұндай халықаралық деңгейдегі үлкен шараны өткізе алмас едім. Үлкен қолдау танытқан Атырау облысы әкімдігіне,  дәстүрлі фестивальге екі жыл қатарынан төрағалық еткен Асанәлі Әшімов бастаған қазылар алқасына шексіз алғысымды білдіремін. Менің 60 жасым Тәуелсіздіктің 25 жылдығының қасында ештеңе емес. Мәңгілік еліміз жасай берсін. Алла ғұмыр берсе әлі жазар дүниелер жетіп жатыр. 

Нұрбейбіт Нұғыманов

Сурет Әнуар Әбілғазиевтікі