«Бала дауысы» байқауының ақтық сынында атыраулық Рауан Матаева өнер көрсетеді

ATPress.kz. 2 тамыз. «Бала дауысы» ұлттық балалар ән байқауының аймақтық іріктеу сынынан сүрінбей өткен атыраулық, Н.Тілендиев атындағы кіші өнер академиясының тәрбиеленушісі ақтық байқауға жолдама алды.

Ел тәуелсіздігінің 25 жылдығына орай жарияланып, көктемде іріктеу басталған ұлттық байқауға қатысушы қалалар керуені арасында Атырау қаласы 15-ші болып тіркелді. Іріктеу барысында  7-14  жас аралығындағы 87 жерлесіміз бақ сынаған. 

Отандық жұлдыздар Жұбаныш Жексенұлы, Фарида Ниязова, продюсер Ғалымбек Исмебергенов төрелік еткен тыңдау бірнеше сағатқа созылды. Нәтижесінде, Атырау облысының намысын Рауан Матаева қорғайтын болды. Жас әнші күзде 15 жасқа толады. 

Жеңімпаздың анасы Алмагүл Жаңбырбаеваның айтуынша, баланың әнге деген құштарлығы 3 жасында байқалған. «Ол алғашқы жүлдесін 6 жасында иеленді - Құлсарыда өткен вокал байқауында Гран-при жеңіп  алғанбыз», - дейді анасы. 

Ұлттық байқау күзде қорытындыланады. Оған дейін жас қатысушылар Алматы қаласында тыңғылықты дайындықтан өтуде. 

Айта кетерлігі, байқаудың ақтық сынына қатысушылардың әндері жазылған таспалар білім беру ұйымдарына тегін таратылады. Ұйымдастырушылар өңірлердегі ән пәнінің ұстаздарына арнап «7-12 жас аралығындағы балаларды вокалдық тәрбиелеудің негіздері мен тәжірибесі» атты топтама дайындап шығарған. Курс авторы  - Қазақстанның еңбек сіңірген қайраткері Толқын Забирова. 

«Бала дауысы» байқауының ұйымдастырушылары бүгінде Маңғыстау облысында іріктеу жұмыстарын жүргізуде. 

Руслан Сатов