Махамбет атындағы академиялық қазақ драма театрында «Атырау – ардақты өлкем» атты Болат Қохаманов әндерінен республикалық вокалистер байқауының қорытынды гала-концерті өтті, деп хабарлайды AtyrauPress тілшісі.
Ең алдымен Атыраудың арда ұлы, композитор, «Ерен еңбегі үшін» медалінің иегері Болат Кохамановтың шығармашылығын насихаттау бағытындағы байқаудың жүлдегерлерін марапаттау салтанаты ұйымдастырылды.
Байқау қорытындысымен Алғыс хаттармен марапатталғандар:
1. Ерхат Жакашев – Маңғыстау облысы
2. Мира Сүндетова – БҚО
3. Сұлтанханым Қолдасбай – Қызылорда облысы
4. Өсербай Бөріханов – Шымкент қаласы
5. Жасұлан Сисембаев – Атырау облысы, Мақат ауданы
6. Замира Көлімбетова – Қызылорда облысы, Байқоңыр қаласы
7. Бахытжан Макшат – Қызылорда облысы, Байқоңыр қаласы
8. Ернар Алтын – Ақтөбе қаласы.
Айбар Ғаниұлы (Атырау қаласы) «Жер-Ана» әні үшін «Үздік аранжировка» номинациясын, Алматы қаласынан Досжан Үби мен Ақтөбеден Ернар Дүйсеев «Арнайы сыйлық» номинациясын, Ренат Гайсиннің атынан арнайы «ҮМІТ» номинациясын Батыс Қазақстан облысының өкілі Полина Сармина иеленді.
Ал тараздық Дулат Жасұзақов дипломант атанса, Атырау қаласынан Гүлcаят Габдулова мен Кентау қаласынан келген Ерік Төленов жүлделі III-орынға тұрақтады.
Атырау облысы, Индер ауданының өкілі Мұратбек Жұмашев II-орынға лайық деп танылса, Мержан Қабдолов (Атырау қаласы) I орынды еншіледі. Басты байрақ – Бас жүлдені елордалық Айдын Жұмабаев жеңіп алды.
Марапаттау салтанатынан соң іс-шараның бейресми бөлігі басталып, көрермендер байқау лауреаттары мен Сембек Жұмағалиев, Марат Сарбупеев, Марат Көккөзов, Еділжан Ғаббасов, Ренат Гайсин, Жанна Орынбасарова сынды мәдениет майталмандарының өнерін тамашалауға мүмкіндік алды.
Гала-концерттің шымылдығы байқау қатысушылары мен қонақтарының орындауындағы аймақтың әнұранына айналған М.Ершудың сөзіне жазылған Б.Қохамановтың "Атырау-арман" әнімен жабылды.
Амандық САҒЫНТАЙҰЛЫ