Х.Досмұхамедов атындағы Атырау университетінде «Сарайшық-бабалар мұрасы» жобасы аясында сурет көрмесі өтті. Үздік туынды авторлары үш аталым бойынша марапатталды, деп хабарлайды AtyrauPress тілшісі.
«Сарайшық-бабалар мұрасы» жобасының мақсаты – орта ғасырлық қаланың тарихын жаңғырту, ғылыми негізде зерттеу, кескіндеме өнері арқылы насихаттау. Жобаға 50-ге жуық суретші қатысқан. Олардың қатарында колледж және университет студенттері, ауыл, қала мектептерінің мұғалімдері, зейнеткер суретшілер мен Атырау университетінің оқытушы-профессорлары да бар.
Көрем сурет көрмесіне Сарайшық қаласының таңғажайып табиғаты, тарихи келбеті мен көне жәдіргерлері бейнеленген суреттер мен мүсіндер, графикалық туындылар қойылған. Ұйымдастырушылар үздік туынды авторларын іріктеп марапаттады.
Байқау қорытындысы бойынша білікті мамандардан жасақталған қазылар алқасы үздіктерді анықтады. Қазылар шешімімен «Кескіндеме» жанрындағы туындылар арасынан балаларға арналған сурет үйірмесінің жетекшісі, студент Әсем Жексенбекова - ІІІ орын, Қ.Дүтбаева атындағы педогогикалық колледжінің оқытушысы Еркін Бозжігітов - ІІ орын, PhD докторант, оқытушы Оразбай Қарабалин - І орынды иеленді. Ал, «Графика» жанрындағы аталым бойынша Н.Балғынбаев атындағы №42 орта мектептің мұғалімі Бекболат Демеуов – ІІІ орын, Атырау университетінің аға оқытушысы Ғадылбек Әлжанов – ІІ орын, Исатай ауданы Х.Наубетов атындағы орта мектептің мұғалімі Ролан Шаймарданов – І орынды жеңіп алды.
Жобаға қатысушылар қатарында мүсіндеме жанрында туынды салғандар да жүлдегер атанды. Үздіктер сабында 3-курс студенті Гүлзада Қабирева – ІІІ орын, студент Сәттібек Бақтыгерей – ІІ орын, өнертану ғылымының магистрі, тәжірибелі мүсінші Дидар Төлеуов – І орын алды.
«Сарайшық-бабалар мұрасы» симпозиумының қорытындысы бойынша барлық туындалардың арнайы каталогі жасалып, музейге, білім беру мекемелеріне табысталды. Ал, пленэрдегі суреттер облыстық музейге, университетінің қорына беріледі.
Амандық САҒЫНТАЙҰЛЫ