Табылды Досымовтың шығармашылығына арналған гала-концерт өтті. Гала-концертте бард ақынның шығармашылығына арналған «Самала саздар сағымы» батыс аймақтық ән байқауы қорытындыланды,- деп хабарлайды Өңірлік коммуникациялар қызметі.
Байқауға Ақтөбе, Батыс Қазақстан, Маңғыстау және Атырау облысынан 19 өнерпаз қатысқан. Олар байқау шарты бойынша гитара тартып, эстрада бағытында ән шырқап сынға түскен.
Әділ-қазылардың шешімімен жүлделі III орын ақтөбелік Батырбек Аманқұловқа, маңғыстаулық Серікбол Жетібаевқа және атыраулық Азамат Жұмағалиевке бұйырды. Ал II орынды Атыраудан Орынбасар Жұмаханов пен батыс қазақстандық Зибатолла Ешкаев иеленді. Ән байқауында көпшілікті ерекше даусымен тәнті еткен атыраулық Ізбасар Самиғоллаев I орынды қанжығалады. Қатысушыларға арнайы сыйлықтар мен диплом, алғыс хаттар табысталды.
Мәдени іс-шараға облыс әкімінің орынбасары Дарын Шамұратов қатысып, ақынның отбасы және «Табылды Досымов атындағы республикалық қор» қоғамдық қор басшысы қонақ ретінде шақырылды.
- Бүгін залда ине шаншар жер жоқ. Бұл өздеріңіщ әндерін тыңдап, көзін көрген Табылды Досымов ағамыздың үлкен құрметке лайықтығының дәлелі. Оның өнері мен шығармашылығын сүйетін, оны насихаттайтын барша көрерменге ризашылығымызды білдіреміз. Аты таныстыруды қажет етпейтін, Аяштың ұлынан Алаштың ұлына айналған Табылды Досымовтың 45 жыл ғұмырында осындай өшпес із, мұра қалдырып кетті. Оның ізбасарлары өнерін өлтірмейді, әрі қарай насихаттай береді. Қазақ бар жерде, Алаш бар жерде Табылды Досымовтың өнері ешқашан өлмейді,- деді облыс әкімінің орынбасары Дарын Шамұратов.
Шығармашылық кеште бард ақынның өнері мен шығармашылығына арналған «Самала саздар сағымы» кітабының тұсауы кесілді.
Іс-шарада Табылды Досымовтың ұлы Абыл Аяш, ҚР Ұлттық Ұлан ансамблінің солисті Асхат Әмірғалиев және жергілікті өнерпаздар мен байқау жүлдегерлері өнер көрсетті.