Махамбет атындағы академиялық қазақ драма театры Халықаралық театр күнінде бір топ сала қызметкерін марапаттады. Бұл туралы Өңірлік коммуникациялар қызметі хабарлайды.
Салтанатты жиында облыстық Мәдениет және тілдерді дамыту басқармасының басшысы театр қызметкерлерін атаулы күнмен құттықтап, жылы лебізін білдірді.
- Наурыз айы адамзат баласына жақсы көңіл сыйлайтын және мерекелерге толы уақыт. Халықаралық театр күні де осы айға айырықша мән мен сипат береді. Оған қоса жыл басы жақсы жаңалықтармен басталды. Себебі, Атырау Жастар театры құрылды. Өнерде ойып тұрып орын алатын Махамбет атындағы академиялық қазақ драма театры да жылма-жыл тойлайтын осынау күнде баршаңызды жайдарлы қалыпта көргеніме қуаныштымын және атаулы күнмен құттықтаймын, - деді Ә.Жоламанов.
Іс-шарада уақытпен санаспай еңбек етіп, өмірін өнерге арнаған бірқатар театр қызметкері мапатталды. Осы орайда «Қазақстандық салалық мәдениет, спорт, туризм және ақпарат қызметкерлерінің кәсіптік одағы» қоғамдық бірлестігінің «Еңбек даңқы» төс белгісі тігін цехының маманы Әсел Асмағамбетоваға, техникалық қызметкер Б.Каржауовқа, аталған қоғамдық бірлестіктің құрмет грамотасы грим бөлімінің меңгерушісі А.Карабалина мен инженер У.Утарбаевқа, алғыс хат актрисалар К.Шаматова мен А.Баетоваға, әдебиет бөлімінің меңгерушісі А.Ибраевқа берілді.
Сондай-ақ актер Е.Ертелеуов, оператор Б.Мусин, сахна машинисі М.Утебаев, реквизит бөлімінің қызметкері Б.Зұлқашева облыс әкімінің алғыс хатымен, актер А.Орынбаев пен актриса Д.Альсултанова облыс мәслихатының алғыс хатымен, ал мәдениет басқармасының алғыс хатымен актерлар Н.Омар мен Ә.Джумагалиев марапатталды.
Сонымен қатар «Қазақстан театрлар Ассоциациясы» қоғамдық бірлестігінің алғыс хаты актерлар А.Жанбалаев пен Б.Зинуллинге, актрисалар Д.Далибаева мен Г.Көшербаеваға табысталды.
Өз кезегінде Махамбет атындағы академиялық қазақ драма театрының басшысы Сағынтай Көпжасаров, «Құрмет» орденінің иегері, театрдың көркемдік жетекшісі Темірбек Мұхтаров, «Қазақстандық салалық мәдениет, спорт, туризм және ақпарат қызметкерлерінің кәсіптік одағы» қоғамдық бірлестігінің өкілі Гүлнәр Шайхашева қызметкерлерді құттықтап, номинацияларды табыстады. Олардың ішінде «Жыл акрисасы» болып Әйгерім Қабдешова, «Жыл режиссері» болып Гүлназ Қамысбаева, «Үздік актер» болып Әзілхан Серикбаев танылды.
