Атырау қаласында өнерлі жастардың басын қосқан «Ән ажары» байқауы ұйымдастырылды , - деп хабарлайды Өңірлік коммуникациялар қызметі.
Әлемде кең танымалдылыққа ие болған әндерге жаңа леп беріп, жас әншілердің өзіндік стилін қалыптастыруды мақсат еткен өнер жарысында 16-35 жас аралығындағы 10 әнші бақ сынасты.
- Біздің мақсат – өнер жолына қадам басып, шығармашылығын шыңдап жүрген жастарға қолдау көрсету, олардың дамуына мүмкіндік беру. Жалпы байқауға қатысамын деп 18 адам ниет білдірді. Қазылар алқасы қатысушылардың көптің аузында жүрген 1 туындыны орындауына ғана баға берумен шектелмеді. Әншілердің сахнада өзін-өзі ұстауы, үстіне киген киімі мен әннің өңделуін назарға алды,- деді облыстық халық шығармашылығы орталығының бөлім басшысы Дидар Арыстанғалиева.
Өнер жарысының нәтижесінде Индер ауданынан келген Нұрлан Сағынов жеңімпаз атанды. Махамбеттен келген Исатай Амандық 2-орынға ие болды. Ал үшінші орынға исатайлық Нұрдәулет Сағидолла мен атыраулық Диас Ерболатов лайық деп танылды. Жүлдегерлерге ақшалай сертификат табысталғанын айта кетейік.