Атырау өңірінен шыққан көрнекті ақын-жыраулар мен жазушылардың шығармаларын "Яндекс" порталының «Яндекс-кітаптар» платформасына енгізілді, деп хабарлайды AtyrauPress тілшісі.
Өңірлік коммуникациялар қызметі мәлім еткендей, облыстық мәдениет және тілдерді дамыту басқармасының қолдауымен жүзеге асқан «Атырау толқындары» жоба аясында аталған қосымшаға 15 кітап жүктелген. Қараша айының соңына дейін олардың санын 30-ға жеткізу жоспарланып отыр.
Жоба жетекшілерінің айтуынша, басты мақсат – келешек ұрпақтың кітап оқуға қызығушылығын арттыру, өңірден шыққан ақын-жыраулар мен жазушылардың шығармашылығын көпке насихаттау, әдеби шығармалардың оқылым санын көбейту, шетелдердегі қандастардың қазақ тіліндегі әдеби туындылармен танысуына мүмкіндік жасау,
Платформада Қазтуған Сүйінішұлы, Махамбет Өтемісұлы , Мұрат Мөңкеұлы, Марат Отаралиев, Фариза Оңғарсынова, Табылды Досымов бастаған ақындар мен жыраулардың туындылары, Ә.Сәрсенбаев, Е.Домбаев, И.Жақанов, М.Құлкенов, Н.Қами, М.Мәжитов,Б.Сәрмекова секілді өңірге белгілі авторлардың шығармалары жүктелген.
Айта кетейік, жоба жетекшілері Яндекс порталымен бес жылға келісімшарт жасасты. Алдағы уақытта әдеби туындылардан бөлек, публицистикалық, танымдық дүниелерді қалың оқырманға таныстыру жоспарда бар.
Сәуле МАҒАУ
