Жас келсе, іске

ATPress.kz, 19 қазан. Атырауда облыстық жастар саясаты мəселелері басқармасының ұйымдастыруымен «Atyrau innovation» инновациялық жобалар байқауы басталды.

Байқау алдында жастарға бизнес жоспарды қалай құру керектігі түсіндіріліп, кəсіптік сауатын арттыру мақсатында семинар-тренинг ұйымдастырылды. Тренингке ауыл жастары мен оқу орны студенттерінен құралған 120 дан астам жастар өз еріктерімен қатысып, белсенділік танытты.
Басқарма басшысы Жасұлан Бисембиевтің мəліметіне сүйенсек, байқауға бүгінге дейін 10 жоба ұсынылған. Мақсат - облысымызда әлеуметтік-экономикалық үздік жобаларды жүзеге асыруға қолдау көрсету. Байқауға қатысуға ниеті бар 16-29 жас аралығындағы кез-келген азамат қызмет көрсетуден IT технологияға дейінгі бизнес жобаларын ұсына алады. Ол үшін талапкер алдымен www.zhasatyrau.kz сайтынан нұсқаулықты жүктеп алу арқылы берілген кестені толтырып, Азаттық 17 мекен-жайында орналасқан «Жастарды қолдау орталығы» қоғамдық бірлестігіне тапсыруы тиіс. Бұл жоба жастарға өз идеяларын жүзеге асыруға үлкен мүмкіндік,-дейді ұйымдастырушылар. Конкурс қазанның 22-сі күні қорытындыланып, үздік жоба жеңімпазына 300 мың теңге ұсынылмақ. Ал, 2-ші орынға 150 мың, 3-ші орын иесі 75 мың теңге көлеміндегі ақшалай сыйлықтармен марапатталатын болады.
Нұрбейбіт Нұғыманов