Қашаған консорциумы іске қосылды

АTPress.kz. 7 желтоқсан. Атырауда мемлекет басшысы Нұрсұлтан Назарбаевтың қатысуымен әлемдегі ең ірі кен орындарының бірі - Қашаған кенішінің ресми таныстырылымы болды.

Ағымдағы жылдың 1 қарашасында Қашаған коммерциялық деңгейге сай тәулігіне 75 мың  баррель мұнай өндіретін қуатына жеткен болатын. Қазір мұнайшылар бұл көрсеткішті  екі есеге дейін жоғарылатуға жұмыстануда. Жыл соңына дейін 1 млн. тонна мұнай және 680 млн. м3 газ өндіру жоспарлануда. Алдағы жылдары жылына 13 млн.тонна мұнай және 9 млрд. м3-қа дейін газ өндіру көзделген. Алып кеніш сәтті игерілген ретте, оның айналасында отандық заманауи теңіз сервистік инфрақұрылым қалыптаспақ. 

Бүгінде кенішті игеру жұмыстарына Шлюмберже, Сименс, Энерджи Вуд Групп, Сайпем секілді халықаралық компаниялар тартылып, жетпіске жуық бірлескен әріптестіктер  пайда болды. Қашаған қуатын арттыруға күш салып келетін 274 қазақстандық компанияның  жалпы үлес салмағына келер болсақ, ол  ірі өндірістің  тең жартысына ие. 

Әлеуметтік жауапкершілік аясында консорциум Маңғыстау және Атырау облыстарына  500 млн.АҚШ долларын жұмсау арқылы елуге тарта білім ошағы мен 30 медициналық мекеме, қалалар мен ауылдарға 70-ке тарта инфрақұрылым нысаны мен клубтар, мәдениет үйлерінің құрылысына ұйытқы болған. Бұдан бөлек, бұқаралық спортты арттыру мақсатында аталған облыстарда компания демеушілігімен 12 жаңа кешен пайдалануға берілген. 

Нұрбейбіт Нұғыманов