Нұрлан Ноғаев Иран елшісін қабылдады

ATPress.kz. 29 қыркүйек. Атырау облысының әкімі Нұрлан Ноғаев Иран Республикасының төтенше және өкілетті елшісі Моджтаба Дамирчилуды қабылдады. Кездесуде Атырау өңірі мен Иран елі арасындағы сауда-экономикалық байланыс мәселесі талқыланды.

Айта кетелік, Иран мен Атырау өңірі арасында сауда айналымының негізгі өнімдері – кептірілген жеміс-жидектер, полипропилен, мәрмәр, травертин, алебастр, әйнектер және тағы да басқа тауарлар. Қазір Атырау облысында Иран капиталының қатысуымен бір кәсіпорын тіркелген.

Кездесу кезінде аймақ басшысы Иран тарабын өңірге инвестиция құюға, оның ішінде ауылшаруашылық кешені саласында жұмыс істеуге мән беруге шақырды. Сонымен қатар, көмірсутек шикізаттарын өңдеу және өндіру саласына да назар аударылды. Нұрлан Ноғаев аймақтың инвестиция салуға өте ыңғайлы, әрі тартымды өңір екендігін ерекше атап өтті.

- Елбасымыздың саясаты арқасында Атырау өңірінде инвесторлар үшін барынша қолайлы жағдай жасалып жатыр. Бұл бағыттағы жұмыстар тоқтамақ емес. Сол себепті, сіздерді әлеуметтік-экономикалық әріптестікті дамыта түсуге шақырамын, - деді Нұрлан Ноғаев.

Қазір облыста жаңа индустриялды аймақ құрылып жатыр. Инвесторларға қолайлы жағдай жасау мақсатында мұнда мемлекеттік бюджет есебінен қажетті инфрақұрылымның бәрі тартылады. Ал, Атыраудағы Арнайы экономикалық аймақта қазір 14 компания мұнай-химия саласында ірі инвестициялық жобаларды жүзеге асырып жатыр. Мұнда жұмыс істеп отырған кәсіпорындарға салықтық, кедендік және тағы да басқа жеңілдіктер беріліп отыр. Сонымен қатар, инвесторларға қолайлы жағдай жасау мақсатында жұмыс істеп отырған «Атырау» әлеуметтік кәсіпкерлік корпорациясы ұлттық компаниясы, «Атырау Innovations» ЖШС-сін айта кету керек.

Иран елшісі сөз алғанда арадағы ынтымақтастықты нығайта түсуге ниетті екендіктерін білдірді.

- Біздің арамыздағы қарым-қатынас ежелден келе жатыр. Екі елдің басшыларының арқасында бұл әріптестік одан әрі нығая түсуде. Қазақстан президентінің сәуір айындағы Иранға сапары екі елдің қарым-қатынасында жаңа серпіліс жасады. Көптеген экономикалық құжаттарға қол қойылды. Иран Атырау облысымен әріптестікті дамыта ықыласты», - деді Моджатба Дамирчилу.

Кездесу соңында Нұрлан Ноғаев ертең, 30 қыркүйекте, Атырауда өтетін «Атырау Инвест-2016» халықаралық инвестициялық форумында оң нәтижелерге жетуді тіледі.

Камила Силыбаева