Бұл туралы облыстық төтенше жағдайлар департаменті бастығының орынбасары Магомед Ахриев Өңірлік коммуникациялар қызметі алаңында өткен брифингте айтты, деп хабарлайды AtyrauPress.
Биыл жылдың алғашқы айында-ақ қалада өрт саны 30-ға жетті. Бұл өткен жылдың осы айымен салыстырғанда 15 %-ке көп. Сондай-ақ, көліктердің өртке орануы да 5 жағдайға артық тіркеліп отыр.
Былтыр Атырау қаласында жалпы 183 өндірістік-тұрмыстық өрт тіркелген. Ал 2021 жылы 195 жағдай орын алған. Тілсіз жаудың салдарынан 195 млн теңге шығын келтірілген.
2022 жылы өрт кезінде 4 адам, ал 2021 жылы 10 адам қайтыс болды. Өрттің салдарынан 2 адам, ал 2021 жылы 6 адам жарақат алған.
«Өрттің негізгі себептері - электр сымдары мен электр жабдықтарын монтаждау және техникалық пайдалану тәртібін бұзу. Мұндай 126 жағдай орын алып, тіркелген жалпы өрт санының 62,7%-ін құрайды. Құрылғы мен пештерді пайдалану кезінде өрт қауіпсіздігі ережелерін бұзу салдарынан 31 рет өрт болды. Өрт негізінен тұрғын үй секторында – 126, көлік құралдарында – 39, сауда кәсіпорындары – 7, өндірістік ғимараттарда – 12, монша-кір жуу орындарында – 6 жағдай орын алды. Өрттің басым бөлігі тұрғын үй секторынан шығады. Былтырғы 183 оқиғаның 126-сы тұрғын үйде тіркелді» деді Магомед Ахриев.