23 желтоқсан күні «Google Developer Groups» – IT мамандар қауымдастығы Атырауда алғаш рет технологиялық конференция ұйымдастырмақшы, деп хабарлайды AtyrauPress тілшісі.
Бағдарламада спикерлер, атап айтқанда, атақты "Google" компаниясы мен өзіміздің отандық сарапшылар – "AI", "DS ML", "Flutter", "Web development" тақырыптарында өз тәжірибелерімен бөліседі.
Бұдан бөлек, жүлде қоры 500 мың теңгені құрайтын «Startup» сайысы өтеді деп жоспарлануда. Сондай-ақ, 100 мың теңге жүлдесі бар «Robotics challenge» байқауы өткізілмек.
"Мұндай ауқымды шара мұнайлы өңірде бірінші рет өткелі тұр. Сондықтан жергілікті ІТ мамандары мен осы салаға қызығушылығы бар жастарды осынау мол мүмкіндікті ұтымды пайдалануға шақырамыз. Себебі, қара алтын өндірілетін мұнайлы мекенде ІТ саласына сұраныс өте жоғары. Ендеше, соны өтейтін білікті мамандар да ауадай қажет" дейді ұйымдастырушылардың бірі Айдын Бисенбаев.
Айта кетейік, «Жайық» спорт кешенінде сағат 14.00-де өтетін шараға IT cаласына қызығатын оқушылар мен студенттер және сала мамандары қатыса алады. Басты серіктес – Х. Досмұхамедов атындағы Атырау университеті.
Амандық САҒЫНТАЙҰЛЫ