Тұрғындармен кездесу кестеге сәйкес жүргізіліп келеді. Соған сай аудан әкімінің орынбасары Ерболат Иғали Тасшағылдық ағайынмен жүздесіп, ауылдағы шешімін табуды қажет етіп тұрған мәселелеріне құлақ түрді, деп хабарлайды AtyrauPress тілшісі.
Ауданның солтүстік батысындағы 1800-ден астам ауыл халқы тұратын Тасшағылдық тұрғындар соңғы жылдары аудандағы құрылыстың қарқынына ризашылықтарын білдірді. Ауданмен қатар ауыл да дамудың даңғыл жолына түскендіктерін айтады. Олар ауылдағы тазалық, дәрігерлік амбулатория құрылысы, тәртіп мәселелеріне қатысты ой-пікірлерін білдірді. Кездесу соңында тұрғындарды жеке мәселелері бойынша қабылдау жүргізілді. Бұл туралы аудан әкімдігі мәлімдеді. Тасшағыл ауылында ашық спорт алаңы құрылысы жүргізілуде. Аяқтау мерзімі - 2025 жыл. Мердігер «ИКАС» ЖШС. Қоғам және Қоныстану елді мекендеріне балалар ойын алаңдары алдағы жылдары сатып алынып, орналастырылады.
Сондай-ақ, 8,3 шақырым ауылішілік автокөлік жолының құрылысына ЖСҚ жасақталды. Құрылыс жұмыстарын бастау алдағы жылдардың жоспарында. Жаңа демалыс орынының ЖСҚ 2025 жылы жасалып, құрылыс жұмыстары жүргізіледі. Ұзындығы 1100 метр болатын жаңадан салынған көшелерге көше жарығын орнату жұмыстары үшін келер жылы ЖСҚ жасақталып, құрылыс жұмыстары жүргізіледі.
Ал, дәрігерлік амбулаторияны қайта жаңғырту жұмыстары жүргізілуде. Құрылысы келер жылы аяқталады. Мердігер - «ГрадСтройСервис» ЖШС. Өрт сөндіру депосына жапсаржай салу құрылысы жүргізілуде, жыл аяғына дейін тапсыру жоспарланған. Мердігер «МСК-Батыл» ЖШС.
Амандық САҒЫНТАЙҰЛЫ
