Облыс әкімі Серік Шәпкенов тұрғындарды жеке сұрақтары бойынша қабылдап, өтініш-тілектерін тыңдады, деп хабарлайды AtyrauPress тілшісі.
Облыс әкімінің баспасөз қызметінің мәліметінше, аймақ басшысы азаматтардың көтерген мәселесін сала мамандарымен бірге қарап, қажетті кеңес берді.
Облыс әкімінің жеке қабылдауына келген тұрғындардың арасында Өркен ықшамауданының тұрғындары Тілекқабыл Губашев, Рузия Күзембаева бар. Олар өздері тұрып жатқан елді мекенге балабақша салуды, балалар ойын алаңын жөндеп беруді сұрады.
- Өркен ықшамауданын дамытуға үлесімізді қосып, балаларымызға барлық жағдай жасау үшін ауыл белсендісі ретінде жүрген жайымыз бар. Бұрын Өркенде карьерлерді көму мәселесі актуалды болса, қазір ол да шешімін тапты. Енді бізді алаңдатып отырған мәселе - балабақшаның жоқтығы. Қазір оларды жеке не жақын маңдағы балабақшаға тасымалдап апарып жүрміз. Ол ата-анаға қиындық келтіріп отыр. Бұдан бөлек, балалар ойын алаңының да күйі кеткен, жаңартуды қажет етеді. Осы мәселелерді шешіп беруіңізді сұраймын,-деді Т. Губашев.
Серік Шәпкенов Өркен ықшамауданында 280 орындық балабақша салу үшін жоба жасалатынын айтты. Атырау қаласы әкімінің орынбасары Мейіржан Мұқасовқа Өркенге барып, ойын алаңдарының жағдайымен танысуды тапсырды.
- 2018 жылдан бері Өркенде көптеген оң өзгеріс болды, инфрақұрылым кезең-кезеңімен шешіліп келеді. 280 орындық балабақша салу үшін жобалық-сметалық құжаттама жасау үшін наурызда өтетін мәслихат отырысының күн тәртібіне енгізіп, қаржы сұралады. Бала үйіне жақын жерге қатынау қажет, сол үшін барлық жұмысты жасаймыз. Бұдан бөлек, жауапты басшылар сіздің елді мекендегі ойын алаңдарының жағдайымен танысып, тиісті шешім қабылдайды. Қажет болса жөндеп береміз, бірақ күтіп ұстау тұрғындардың мойнында,-деді С.Шәпкенов.
Сондай-ақ кездесуде білім беру, жұмыспен қамту, денсаулық сақтау, инфрақұрылым, әлеуметтік көмек көрсету сынды мәселелер қаралды.
Сәуле МАҒАУ