Үкіметтік емес ұйымдар марапатталды

Өңірдің ҮЕҰ-мен өзара іс-қимыл және ынтымақтастық жөніндегі кеңес отырысы өтті, деп хабарлайды AtyrauPress тілшісі.

Облыс әкімінің орынбасары Дарын Шамұратовтың төрағалығымен өткен жиынға облыс әкімі жанындағы үкіметтік емес ұйымдармен өзара іс -қимыл және ынтымақтастық жөніндегі кеңес мүшелері қатысты.

Кеңес отырысында ҚР Мәдениет және ақпарат министрлігінің 2024 жылы үкіметтік емес ұйымдарға арналған сыйлықақы конкурсында жеңімпаз атанған атыраулық 7 ұйымға марапаттар табысталды.

Олар төмендегі номинациялар бойынша үздік танылып, Атырау облысы жалпы нәтижеде республика бойынша ІІ орынға ие болды.

▪️«Хиуаз» қоғамдық бірлестігі – «Мәдениет пен өнерді дамыту» номинациясы;

▪️«Өмір гүлі» Атырау облысының мүмкіндігі шектеулі жандардың шығармашылық орталығының қоғамдық бірлестігі – «Мәдениет пен өнерді дамыту» номинациясы;

▪️«Атырау Рауан» қоғамдық қоры – «Жетім балаларға, толық емес және көпбалалы отбасылардағы балаларға көмек көрсету» номинациясы;

▪️«Айналайын баладан» қоғамдық қоры – «Жетім балаларға, толық емес және көпбалалы отбасылардағы балаларға көмек көрсету» номинациясы;

▪️«Жүректен жүрекке» қоғамдық қоры – «Волонтерлік бастамаларды дамыту және қолдау» номинациясы;

▪️«Шаңырақ-2008» қоғамдық бірлестігі – «Отбасылық-демографиялық және гендерлік мәселелерді шешуге жәрдемдесу» номинациясы;

▪️«Талаптан» қоғамдық бірлестігі – «Қоршаған ортаны қорғау» номинациясы.

Сондай-ақ белсенді күміс волонтер Армангүл Асқароваға ҚР Мәдениет және ақпарат министрі Аида Балаеваның Алғыс хаты табысталды.

Айта кетейік, жиын соңында 2025 жылға арналған кеңестің жұмыс жоспары бекітілді.