Қанша атыраулық атаулы әлеуметтік көмек алады?

Атырауда халықтың осал топтарын қолдау үшін әлеуметтік көмектің бірнеше түрі ұсынылады, мысалы, атаулы әлеуметтік көмек, коммуналдық қызметтер шығындарын өтеу үшін тұрғын үй көмегі, үйде оқитын мүгедек балаларға және басқа да ай сайынғы және бір реттік әлеуметтік төлемдер, деп хабарлайды АtyrauРress тілшісі.

Атаулы әлеуметтік көмек (АӘК) - еңбекке қабілетті азаматтарды жұмыспен қамту шараларына тарту, еңбекке ынталандыру арқылы жан басына шаққандағы орташа табысы кедейлік шегінен төмен отбасыларға көрсетілетін мемлекеттік қолдау түрі.

Біріншіден, бұл екі түрге жіктелген ақшалай төлем: шартсыз және шартты ақшалай көмек. Еңбекке жарамсыз азаматтары бар отбасыларға шартсыз ақшалай көмек көрсетіледі және олар үшін жәрдемақы алу үшін жұмыспен қамту шараларына міндетті түрде қатысу талап етілмейді. Шартты ақшалай көмек құрамында жұмысқа орналаса алатын кемінде бір еңбекке қабілетті мүшесі бар отбасыларға арналған.

Екіншіден, бұл - жұмыспен қамтуға жәрдемдесу шаралары. АӘК тағайындаудың барлық кезеңіне отбасымен әлеуметтік келісімшарт жасалады. Келісімшартты бұзу бүкіл отбасына АӘК төлеуді тоқтату және келесі алты айда АӘК тағайындаудан бас тарту үшін негіз болып табылады.

Үшіншіден, 1 жастан 6 жасқа дейінгі аз қамтылған отбасылардан шыққан балаларға 1,5 айлық есептік көрсеткіш мөлшерінде қосымша төлем беріледі. АӘК жиынтық табысы ең төменгі күнкөріс деңгейінің 70%-нан аз отбасыларға беріледі.

2025 жылдың 1 қаңтарына Атырау облысында 849 отбасының 5033 азаматына 559,9 млн. теңге көлемінде АӘК тағайындалды. Оның ішінде шартты ақшалай көмек (жұмыспен қамту шараларымен қамтылған) 621 отбасынан 3914 адам, шартсыз ақшалай көмек (жас балалары бар әйелдер, еңбекке жарамсыз мүгедектер) 234 отбасынан 1156 адам алды.

АӘК алушылар қатарына 18 жасқа дейінгі балалардың 68,9%, жұмыссыздардың 3,7%, өтініш берген кезде жұмыс істеген адамдардың 10,2%, зейнеткерлердің 0,6%, мүгедектігі бар адамдардың 0,7%, студенттердің 3,6%, бала күтімі бойынша жұмыспен қамтылғандардың 11,2% және басқалары (1,1%) кіреді. Сонымен қатар, АӘК алатын 722 отбасының ішінен 1 жастан 6 жасқа дейінгі 1408 балаға жалпы сомасы 72,8 млн.теңгеге қосымша төлем тағайындалды. Шартты ақшалай көмек алушылардың ішінен Жұмыспен қамту орталығында жұмыссыз ретінде тіркелген 187 адам жұмыспен қамту іс-шараларына толық тартылды.

Сонымен қатар, еңбек министрлігінің ақпараты бойынша, АӘК қажет ететін қазақстандықтардың саны биыл екі есеге өспек. Егер 2024 жылы АӘК-ті 413,7 мың адам алса, биыл 1 млн адам алады. 2024 жылы облыста 243 аз қамтылған отбасыға жергілікті бюджеттен 9,7 млн теңге көлемінде коммуналдық қызметтер бойынша тұрғын үй көмегі көрсетілді.

Амандық САҒЫНТАЙҰЛЫ