Биылғы пітір садақа мөлшері 655 теңге болып бекітілді

Қазақстан мұсылмандары діни басқармасының Төралқа мәжілісінде биылғы пітір садақасының мөлшері 655 теңге болып белгіленді, деп хабарлайды AtyrauPress тілшісі.

Бұл туралы Атырау облысының бас имамы Болатбек Ұласқанұлы Өңірлік коммуникациялар қызметі алаңында мәлім етті. Пітір садақаның мөлшері еліміз бойынша 2 келі ұнның орташа бағасымен есептелді. 

Мұсылман қауымы үшін тазару айы болып табылатын қасиетті Рамазан 1-ші наурызда басталады. Биылғы ораза мерзімі — 29 күн. Наурыз айының 26-нан 27-не қараған түні – қасиетті Қадір түні. 30 наурыз – Ораза айт мерекесі.

- Рамазан – мейірім мен қайырымдылықтың, ізгіліктің айы. Ал бұл айда пітір садақасын беру – мұсылмандық міндетіміздің бірі. Биылғы Рамазан айында да мешіттерде ауызашарлар ұйымдастырылып, халықты бірлік пен мейірімділікке шақыру жалғасады. Ораза айы күн райының салқын мезгіліне келуіне байланысты ауызашарлар мешіттердің ішінде ұйымдастырылатын болады. Қасиетті айда кешкі тарауих намазынан қайтататын адамдар үшін жылдағы үрдіс бойынша тегін қоғамдық көліктер ұйымдастырылады,- деді Болатбек Ұласқанұлы.

Ал Атырау облысы Дін істері басқармасының басшысы Қаһарман Мұсаев Рамазан айындағы қауіпсіздік пен қоғамдық тәртіпке тоқталды

- Ораза ұстауға ниеттілер дәрігермен кеңесіп, күн ысыған кездері қозғалыс белсенділігін азайтып, ағзаның құрғап қалмауына жол бермеуі керек. Жұмыс берушілер қызметкерлердің жағдайын ескеріп, икемді жұмыс кестесі мен қосымша үзілістер ұсынса дейміз. Қызметкерлер еңбек тәртібін сақтауы тиіс. Ауызашар мен басқа жиындарда қоғамдық тәртіп пен тазалық сақталуы керек. Бұл — қоғам үшін маңызды. Ал кәсіпкерлердің азық-түлік бағасын негізсіз көтермеуі үшін арнайы бақылау жүргізіледі. Сонымен қатар әлеуметтік осал топтарға көмек көрсету үшін қайырымдылық шараларын заң аясында ұйымдастыруды ұсынамыз,- деді Қ.Мусаев.

Сәуле МАҒАУ