Тұтынушылардың құқықтарын қорғауға бағытталған дөңгелек үстел өтті, деп хабарлайды AtyrauPress тілшісі.
«Қазақстан Халық партиясы» қоғамдық бірлестігі Атырау облыстық филиалының ұйымдастыруымен «Тұтынушылардың құқтарын қорғау, құқықтық сауаттылығын арттыру және сауда қызметін реттеу» мәселесіне арналған дөңгелек үстел өтті. Бұл туралы Өңірлік коммуникациялар қызметі мәлім етті. Іс-шараға Атырау облысы сауда және тұтынушылар құқығын қорғау департаменті, кәсіпкерлік бөлімі және басқа да қоғамдық ұйым мүшелері қатысты.
Соңғы уақытта дүкен сөрелеріндегі тауар құнының дұрыс көрсетілмеуі, баға айырмашылықтарының болуы және оның негізсіз өсуі жөнінде арыз-шағымдар жиі түсуде. Осыған байланысты мұндай мәселелерді реттеу және тұтынушылардың құқықтарын қорғау бағытында тиісті шаралар қабылдануда.
– Қазіргі уақытта тұтынушылардан сапасыз тауарларға, әсіресе, азық-түлік емес өнімдерге қатысты арыз-шағымдар көптеп түсуде. Сол үшін шағымы бар тұтынушыларға айтарым, ең алдымен тауарды сатып алған сауда орнына жүгініп, өз пікіріңізді білдіріңіз. Егер өнім сапасыз болып шықса немесе толыққанды пайдалануға келмейтін кемшіліктері болса, алдымен сатушыға ресми түрде арызданған жөн. Біз осыдан кейін ғана тұтынушының құқығы бұзылғанын ресми түрде бекіте аламыз. Кейбір азаматтар бұл тәртіпті білмей, бірден полицияға жүгініп жатады. Алайда құқық қорғау органдары мұндай арыздарды сауда орнына бағыттамайды. Сондықтан тұтынушыларға айтарымыз, қандай да бір шағым туындаған жағдайда ең алдымен сауда орнына өтініш жасау қажет. Көп жағдайда мәселе сатушымен тікелей байланыс арқылы тез әрі оңтайлы шешілуі де мүмкін, – дейді облыстық сауда және тұтынушылар құқықтарын қорғау департаменті басшысының орынбасары Еркебұлан Тағашов.
Облыстық сауда және тұтынушылар құқықтарын қорғау департаментіне 2024 жылы жеті жүзден астам арыз түскен. Оның 90 пайызы қанағаттандырылды. Ішіндегі қырық пайызы түсіндірме жұмыстарымен аяқталды.
Сәуле МАҒАУ