Атырау облыстық ішкі саясат басқармасына қарасты “Азаматтық орталық” мекемесінен 2023 жылы 264 азамат кеңес алса, биыл бұл көрсеткіш 3 есеге көбейіп, 846-ға жетті, - деп хабарлайды Өңірлік коммуникациялар қызметі.
Ішкі саясат басқармасының мемлекеттік әлеуметтік тапсырысы шеңберінде азаматтық қоғамды дамыту үшін 22 жобаны 12 үкіметтік емес ұйым іске асырған. Мысалы, отбасы институтын насихаттау, гендерлік теңдікті ілгерілету және тұрғындарға құқықтық кеңес беру бағытында 3 әлеуметтік жоба аясында 3000-нан астам адам қамтылды.
Жалпы өңірде барлығы 807 ұйым тіркелген.
Осы жылы ҚР Мәдениет және ақпарат министрлігінің үкіметтік емес ұйымдарға арналған сыйлықақы конкурсында атыраулық 7 ұйым жеңімпаз атанып, Атырау облысы республика бойынша ІІ орынға шықты. Одан бөлек, ҮЕҰ-дар арасында облыстық «Үздік әлеуметтік жоба» байқауы ұйымдастырылып, жеңімпаз атанған 6 ұйым тәжірибе алмасу мақсатында Қостанай және Өскемен қаласына жолдама алды.