Бүгін ҚР Парламенті мәжілісінің депутаты, «AMANAT» партиясы фракция мүшесі Дүйсенбай Тұрғанов Қызылқоға ауданына жұмыс сапарымен келді, деп хабарлайды AtyrauPress тілшісі.
Іссапары барысында Миялы балалар өнер мектебі, Миялы-Тайсойған су құбырының құрылысы, Ералы су торабында орналасқан гидротехникалық құрылыстарды қайта жаңғырту жұмыстары және су тасқыны кезінде бүлінген жолдар мен көпірлерге барып қалпына келтіру жұмыстарымен танысты.
Миялы балалар өнер мектебінің ғимараты 1959 жылы аурухана болып ашылған, кейін балалар кітапханасы, спорт мектебі болды. 2011 жылы күрделі жөндеуден өтіп, Миялы өнер мектебі болып жұмыс жасауда. Аудан бойынша 8 филиалы, 909 оқушысы бар. Қазіргі таңда ғимарат ескірген, кабинеттер таршылық етуде. Қазіргі таңда демеушілер арқылы жобалық-сметалық құжаттамасы жасақталып, сараптаманың оң қорытындысы алынды. Ендігі кезекте қаржысы сұратылып, жаңа нысанның құрылысын бастау жоспарланып отыр.
Тайсойған-Миялы су құбыры құрылысын мердігер «Сапа құрылыс-2007» ЖШС жүргізуде. Ұзындығы 73,5шқ «Тайсойған-Миялы су құбырын салу» жобасы Миялы және Жангелдин ауылдарының тұрғындарын тұрақты ауыз сумен қамту үшін жасалған. Қазіргі кезде 10 км су құбыры салынды. Жоба бойынша 12 дана су ұңғымасы, 2 дана су айдау бекеті салынады. Құрылыс жұмыстары 2025 жылы аяқтау жоспарланған. Алайда, жұмыс барысымен танысқан Дүйсенбай Нұрбайұлы құрылыс жұмыстарының баяу жүргізіліп жатырғандығын айтып, тапсырыс беруші су ресурстары және ирригация министрлігінің Сушаруашылығы комитетіне жұмыс көлемін арттыруды тапсыратындығын жеткізді.
Сонымен қатар, мәжіліс депутаты «Миялы-Жангелдин» бағытындағы жырылған тас жолға барып, көпір салу жұмыстарының барысы мен су тасқыны кезінде бүлінген тасжолдармен де танысты.
Көктемгі су тасқыны кезінде Миялының іргесіндегі жырылған жолдың үстінен салынатын ұзындығы 61 м көпір құрылысын «АИС» ЖШС жүргізуде. Ойыл өзені мен Көздіғара өзегінің үстіндегі көпірлер мен «Сағыз-Миялы-Қарабау-Индер» облыстық маңызы бар автокөлік жолдары бірнеше жерден жырылып, бұзылған. Жолды жөндеу және оның астынан 14 жерден су өткізгіш құбырлар мен мал өткелегін салу жұмыстарын «Ассана-дорстрой» ЖШС жүргізуде. Аталмыш құрылыстар қараша айында аяқтау жоспарланған.
Нысандарды аралағаннан кейін, Парламент Мәжілісі депутаты құрылыстары баяу жүргізіліп жатырған 2 нысан бойынша тапсырыс беруші су ресурстары және ирригация министрлігінің Сушаруашылығы комитетіне уақытында сапалы аяқтау бойынша ұсыныс білдіретіндігін жеткізді.