Мемлекет басшысы Қасым-Жомарт Тоқаев барлық деңгейдегі мәслихаттар депутаттарының II республикалық форумында мәслихат мемлекеттік биліктің өте маңызды тармағы екенін атап өтті. Осы орайда, біз осынау маңызды Президент маңыз берген бірқатар мәселені саралап көрген едік, деп хабарлайды AtyrauPress тілшісі.
Атыраулық ғалым – тарих ғылымдарының докторы Аққали Ахмет Мемлекет басшысының сөзін толықтай қолдайтынын айтады.
– 2022 жылы референдум арқылы Конституцияға маңызды өзгерістер енгізілді, - дейді ол. – Соның нәтижесінде Парламенттің рөлі айтарлықтай күшейді. Жалпы, билік институттарының жұмысын жетілдіру үшін нақты шаралар қабылданды.
Ал, бұл жолғы жиында Президент депутаттардың өкілді билік функциясын халықтың сеніміне сай жоғары деңгейде атқаруына қажет бірнеше мәселеге тоқталды. Қасым-Жомарт Тоқаев, ең бірінші кезекте, мәслихат депутаттарының біліктілік деңгейін жоспарлы түрде арттыру керек деп санайды. Мемлекет басшысының пікірінше, мәслихаттардың жергілікті экономикалық саясатқа ықпалын арттыра түсу мәселесіне айрықша мән берген жөн.
Қасым-Жомарт Кемелұлы демократия үздіксіз жүретін үдеріс екеніне айрықша назар аударды. Оның пікірінше, әлемдегі кез келген табысты демократиялық қоғам айналасына бей-жай қарамайтын азаматтардың арқасында ғана дамиды, өміршең болады. Бұл ретте Президент келер ұрпаққа қажетті жағдай жасау ортақ парызымыз екеніне назар аударып, балалардың қауіпсіздігін қамтамасыз ету, құқықтарын қорғау, олардың жан-жақты дамыту мемлекеттік саясаттың ең басты басымдығы болып қала беретінін жеткізді.
Президент саяси партиялардың қоғамдағы өзекті мәселелерді шешуге бағытталған жобалары мен бастамаларына тоқталып, көктемгі алапат су тасқыны кезінде бекем бірліктің үлгісін көрсеткен партиялардың, өзін-өзі ұсынған депутаттардың азаматтық белсенділігіне оң баға берді. Сондай-ақ, ауыл, аудан және облыстық маңызы бар қала әкімдерін тікелей сайлау жүйесі елімізде жаңа саяси ахуалдың қалыптасуына жол ашқанын атап өтті.
Сонымен бірге, Мемлекет басшысы бақытты балалықтың негізі отбасы институты екеніне тоқталып, ата-аналарды тәрбие мәселесіне салғырт қарамауға шақырды. Әсіресе, ұрпақтың цифрлық дүниелерге тәуелді болуы мен виртуалды әлемге шектен тыс құмартуы нағыз дертке айналып бара жатқанына алаңдаушылық білдіріп, керісінше, оларға ел ішіндегі шынайы қаһармандарды насихаттау қажет екенін айтты. Мен де бұл пікірге қосылатынымды айтқым келеді.
Иә, расымен де, қоғам үнемі жаңаруды және жақсы жаққа қарай өзгеріп отыруды талап етеді. Сондықтан өркениет көшінен қалмай, қолдан келгенше жаңашылдыққа жақын жүруіміз керек. Президенттің өзі де депутаттарды өз біліктіліктерін арттыруға шақырып отыр емес пе? Демек, білім де, білік те ешқашан артық етпейді. Бүгінгі заманның талаптарына жауап бере алатын қоғам ғана өседі, өнеді. Мұны уақыттың өзі айқын көрсетіп отыр.
Сол сияқты, атыраулық ардагер ұстаз Алпамыс Ғилымов та аталған форумда көтерілген бастамаларды қуана қолдайтынын және бұдан жастар жағы да қалыс қалмаса екен деген тілегін жеткізді.
– Президент өздерін блогер санап жүргендерге қатысты өте орынды ой білдірді. Жалпы, блогер деп тек әлеуметтік желіде ақпарат жариялайды. Ал соның сілтемесін алып «фейсбук» секілді әлеуметтік желіге және «ватсапп» пен «телеграмм» секілді мессенджерлерге тарататын бұл – smm-мамандар. Осы ретте, сайт журналистері блогер емес екенін еске салғымыз келеді. Олар да толыққанды газет-журнал мен телеарна журналистері секілді заң алдында жауап беретін мамандар. Яғни, блогер тек «инстаграм», «телеграмма» және «фейсбук» секілді әлеуметтік парақшаларда блог жазып жариялайды. Сәйкесінше, олар жүргізетін парақшалардың ресми тіркелуі екіталай. Біреулер заң талаптарына сай жеке кәсіпкер ретінде тіркеліп, мемлекетке салығын төлейді. Бірақ көбісі тіркелмей жұмыс жасағанды жөн көреді. Себебі, оларға заң жүзінде әзірге ондай талап қойылмаған.
Сондықтан блогерлердің заң алдындағы жауапкершілігін арттыру керек деп ойлаймын. Өйткені, олардың артында қалың орман халық тұр. Қарапайым оқырман қай мәліметтің рас, қайсысы өтірік екенін қайдан біледі? Ендеше, халық қалаулылары осы мәселені Үкімет алдында көтеруі керек деп ойлаймын. Айтпақшы, кейбір блогерлер әдейі жалған ақпарат таратады. Яғни, қасақагна қателік жібереді. Бұл – халықтың назарын өзіне аударудың бір тәсілі. Осылайша, парақша қолданушыларының санын көбейтіп алғысы келеді , - дейді ол бізбен әңгімесінде.
Амандық САҒЫНТАЙҰЛЫ
Фото: "Ақорда"