Б. Сағынтаев: «Жеріне жаны ашитын азаматтардың барлығы жер реформасын талқылауға белсенді түрде қатыссын»

ATPress. 19 мамыр. Бүгін Астанадағы Орталық коммуникациялар қызметінде өткен брифингте жер реформасы бойынша құрылған комиссияның жұмысы және осы жер мәселесіне байланысты атқарылып жатқан жұмыстар туралы айтылды.

Брифингке Қазақстан Республикасы Премьер-министрінің бірінші орынбасары, комиссия төрағасы Бақытжан Сағынтаев қатысып, комиссияның алғашқы отырысы бойынша қорытындылар  21 мамыр күні шығарылатынын айтты.

«Бізге келген ұсыныстар мен пікірлердің, жер мәселесіне қатысы барларын комиссия отырысына қалдырып, қалғандарын құзыретті органдарға жолдайтын боламыз. Сонымен қатар, жер мәселесі бойынша әлеуметтік желілер мен ғаламторға шығып жатқан барлық пікірлер мен ұсыныстар қаралатын болады», - деп атап өтті Б. Сағынтаев.

Оның айтуынша, 1434 нөмірімен жұмысын бастаған call-орталыққа қоңырау арқылы жалпы саны 700 астам және jerturaly.kz сайты арқылы 30 жуық ұсыныс келіп түскен.

«Жеріне жаны ашитын азаматтардың барлығы жер реформасын талқылауға белсенді түрде қатыссын. Бұл орайда Алматы, Астана қалаларының және облыс орталықтарынан арнайы ашылған қоғамдық қабылдау бөлмелері жұмыс жасауда. Жер үшін жаны ауыратындардың барлығы өз сөзін айтуы керек, деп Елбасы айтып өткендей, еліміздің барша азаматтарын жер мәселесі бойынша өз ойларын айтып, пікірлерін білдіруге шақырамын», – деді ол.

Сондай-ақ, ҚР Премьер-министрінің бірінші орынбасары комиссия мүшелері белгілі бір бағыттағы жұмыс топтарын құру туралы ұсыныс жасап, ол бірауыздан қабылданғандығын және қазіргі уақытта экономикалық, құқықтық, рәсімдердің заңдылығы мен ашықтығын қамтамасыз ету, комиссия шешімдерін түсіндіру және ақпараттандыру топтары құрылғандығын атап өтті.

Даурен Бекбол

Сурет ortcom.kz сайтынан алынды