«Жаңаша» қоғамдық қоры Жылыой ауданының егде жастағы тұрғындарына жаңа мүмкіндіктер беретін «50+ Ешқашан кеш емес» жобасын бастады, деп хабарлайды AtyrauPress тілшісі.
“Теңізшевройл” компаниясының әлеуметтік инвестициялар бағдарламасы аясында қаржыландырылатын бұл жоба орта жастан асқан және зейнетке шыққан жандардың салауатты өмір салтын ұстанып, денсаулығын жақсартуға, бос уақыттарын ұнамды іске жұмсауына көмек беруге бағытталған.
Жобаның тұсауын кесуге жиналғандарға жоба туралы және әр бағыт бойынша таныстырылым жасалып, қоғамдық қор жетекшісі Алтынай Серікбай жобаның мақсаты мен маңызына тоқталды.
– Біз ауданның орта жастан асқан адамдарының уақытын тиімді әрі пайдалы өтуіне үлесімізді қосу мақсатында осы жобаны қолға алдық. Жыл соңына дейін жалғасатын би, йога, ағылшын тілі және вокал сабақтары аға-апаларымыздың, ата-әжелеріміздің көңіліне қуаныш сыйлап, денсаулықтарын жақсартуға септігін тигізеді деген сенімдеміз, - деп атап өтті жоба жетекшісі.
Аудан бойынша жоба 100 адамды қамтуды жоспарлап отыр, олардың 50-і негізгі таңдаған бағыты бойынша жыл соңына дейін сабақтарға қатысуға мүмкіндік алса, қалған 50 адам жоба аясында өткізілетін шеберлік сабақтарына, психолог, заңгерлердің кеңестеріне, қосымша курстарға шақырту алады.
– Бұл жобаға қызығушылық танытқан егде жастағв жылыойлықтар көп болды. Әрине, жобаның маңызы мен пайдасы түсінікті. Жобаға сәттілік тілеймін және жалғасын табады деген үміттемін, - деді өз сөзінде аудан әкімінің орынбасары Гүлнафис Айшуақова.
Сабақтарды жергілікті мамандар өткізеді. Бұл, өз кезегінде, олардың да жұмыспен қамтылуына жағдай туғызып отыр. Олар қатысушылардың жас ерекшелігі мен физикалық мүмкіндіктеріне сай бағдарлама бойынша жұмыс істейді.