Абай орталығындағы JasSpace кеңістігінде қосымша білім алып жүрген Расулбек Дүзелбайұлының жаңа жобасын Атырауға іссапармен келген АҚШ-тың Қазақстандағы елшісі Дэниел Розенблюмнің өзі жоғары бағалады, деп хабарлайды AtyrauPress.
Жас ғалымның жер сілкінісіне төтеп беретін көпқабатты тұрғын үй макетін жасап шығаруына Түркия мен Сириядағы табиғи апаттар себеп болған екен. Расулбек басқа емес, дәл осы жобаны жасап шығаруына Түркия, Сирия елдерінде болған зілзала апатының себеп болғанын айтты.
"Зілзала кезінде Түркияда 160 мыңнан астам ғимарат жермен жексен болған. Ал, менің жобам кемінде 7-8 баллдық жер сілкінісіне төтеп бере алады. Үйдің іргетасы жер қыртысына бекітілген. Басты ерекшелік те осында. Яғни, зілзала кезінде жер қыртысынан бөлінген толқын үйдің іргетасы мен жердің ортасындағы пружинаға сақталады. Пружина ол жердегі толқындарды өзінің бойына сіңіріп алады. Осылайша, сілкініс кезінде үй тербелгенімен, қирамайды" дейді "ЭкоLab" курсында білім алған оқушы.
"ЭкоLab" курсының тренері Нұргүл Имамұратова бұл жобаны дайындауға шәкіртінің көп уақыт жұмсағанын айтады.
"Бізде курстар екі ай бойы жүреді. Курстың басында оқушыларға тапсырма беремін. Яғни, олар сертификат алу үшін өмірдегі белгілі бір мәселені шеше алатын жоба жасап шығару керек. Ол үшін бала курс барысында алған теориялық, практикалық білімін пайдаланады. Тапсырма берілген уақытта Түрки мен Сирияда жер сілкінісі болды. Сондықтан, Расулбектің де ғылыми жаңалығы күнделікті өмірден туындап отыр. Осы орайда, сейсмикалық қауіпті аймақтардың қатарында Алматы облысы да бар. Егер құрылыс компаниялары қызығушылық танытса, біз бұл идеяны әрі қарай дамытып, жетілдіруге дайынбыз" дейді жас ғалымның жетекшісі.
Айта кетейік, жергілікті жастарды дамыту мақсатын көздейтін "JasSpacе" бағдарламасын Орталық Азияның Еуразия қоры жүзеге асырып отыр.
Амандық САҒЫНТАЙҰЛЫ