Б.Қарабалиев қазіргі заманда халықаралық жобалар – жекелеген өңірлерді дамытуда ғана емес, мамандардың кәсіби өсуіне де ықпал ететін маңызды фактор екеніне сенімді, деп хабарлайды AtyrauPress тілшісі.
Ол 2010 жылы Теңіз кен орнында технологиялық құбыр жолының 5 разрядты құбыр жөндеушісі болып еңбек жолын бастаған. Тәжірибе жинақтаған сайын оны жоғары қызметке ауыстырып, басшылық күрделі жұмыстарды сеніп тапсыра бастайды. Осылайша 2013 жылы ол технологиялық құбыр жолының 6-разрядты құбыр жөндеушісі болады, кейін жұмыстың орындалуына жауапты болып, ал екі жылдан кейін технологиялық құбыр жолы учаскесінің шебері болып тағайындалды.
«Ішкі және сыртқы құбырларды монтаждау жөніндегі слесарь» мамандығы бойынша алған кәсіби білімі және жинақтаған тәжірибесі 13 жыл бойы туған елінде ауқымды жобаларды дамытуға үлес қосып, кейін халықаралық еңбек нарығына шығуға мүмкіндік берді. Оның мансаптық өсуінде үш тілді білімі мен ASTM (Американдық материалдар стандарттары) құбыр монтажы және металл конструкциялары сызбаларын білуі маңызды рөл атқарды. Сондай-ақ тіл тапқыштық, адалдық және жауапкершілік сияқты жеке қасиеттері де өзіндік үлес қосты. Биыл «FSSA» рекрутингтік компаниясының көмегімен іріктеу кезеңінен өтіп, қазір Гданьск қаласындағы SAFE поляк компаниясында жұмыс істейді.
Б.Қарабалиев халықаралық жобаларда табысты мансапқа жету үшін білім алудың және әртүрлі тәжірибе жинаудың маңыздылығын атап өтті. Және ол үнемі ой-өрісті кеңейтіп, жаңа дағдыларды үйрену, білу үшін барлық мүмкіндіктерді пайдалануға кеңес берді. Ал алғашқы жұмыс орнына айтар алғысы шексіз екенін жеткізді.
- Мен Теңіз кенішіне 11 жылдық керемет кәсіби жол үшін алғыс айтамын. Бұл халықаралық жобалардағы, әсіресе үшінші буын зауыттарындағы тәжірибе - менің өсуім үшін маңызды болды. Теңіз – бұл жай ғана жобалар мен тапсырмалар емес, ол менің кәсіби маман ретінде өскен, ең күрделі сәттерде менің бригадам белсене атсалысқан жер. Теңізге мұнай-газ саласының дамуына үлес қосу мүмкіндігі үшін және халықаралық еңбек нарығына сәтті енуіме көмектескен құнды тәжірибе үшін алғыс айтамын, - деді Б.Қарабалиев.
