Атырау облыстық сотының қылмыстық істер жөніндегі сот алқасы Атырау қаласының әкімшілік құқық бұзушылықтар жөніндегі мамандандырылған сотының қаулысын өзгеріссіз қалдырды, деп хабарлайды AtyrauPress тілшісі.
Облыстық соттың баспасөз қызметінен білгеніміздей, биыл 7 шілдеде И.Қ. Махамбет ауданы Бейбарыс ауылындағы Әйтеке би көшесінде орналасқан «Болашақ» шағынмаркетіне өзінің жас баласымен бірге барып, дүкен иесінің рұқсатынсыз дүкенді, меншік иесі А.Есениязованы және басқа да келушілерді бейнежазбаға түсіріп, жанжал шығарып, айналасындағыларға сыйламаушылық білдіріп, қоғамдық тәртіпті және жеке тұлғалардың тыныштығын бұзған.
Бұдан басқа, 2023 жылғы 07 шілдеде И.Қ. сол шағынмаркетте өзара жанжал кезінде азаматша А.Есениязованы ұрып-соғып, денсаулығына жеңіл зиян келтіруге әкеп соқпаған тән ауыруына ұшыратқан.
И.Қ.-ның кінәсі сот отырысында зерттелген іс материалдарымен, атап айтқанда әімшілік құқық бұзушылық туралы хаттамалармен, жауап алу хаттамаларымен, жәбірленушінің айғақтары және тараптар ұсынған бейнежазбалармен толық дәлелін тапты.
ӘҚБтК-нің 73-2 бабының 1-бөлігінің санкциясында 10 айлық есептік көрсеткіш мөлшерінде айыппұл салу не 10 тәулікке дейінгі мерзімге әкімшілік қамаққа алу жазасы көзделген. ӘҚБтК-нің 434-бабының 1-бөлігінің санкциясында 20 айлық есептік көрсеткіш мөлшерінде айыппұл салу не 5-тен 15 тәулікке дейінгі мерзімге әкімшідік қамаққа алу жазасы көзделген. И.Қ.-ның жауаптылығын жеңілдететін, ауырлататын мән-жайлар анықталмады.
Атырау қаласының әкімшілік құқық бұзушылықтар жөніндегі мамандандырылған сотының 2023 жылғы 08 қарашадағы қаулысымен И.Қ. жоғарыда көрсетілген әкімшілік құқық бұзушылықтарды жасағаны үшін кінәлі деп танылып, оған ӘҚБтК-нің 434-бабының 1-бөлігі бойынша – 48 300 теңге, 73-2 банының 1- бөлігі бойынша – 24 150 теңге әкімшілік айыппұл түріндегі жаза қолданылды.
Іс апелляцияда сот қаулысының күшін жойып, И.Қ.-ға қатысты істі қысқартуды сұраған әкімшілік жауаптылыққа тартылған тұлғаның апелляциялық шағымы және прокурордың апелляциялық өтінішхаты бойынша қаралды. Істі қару барысында алқа бірінші сатыдағы соттың әкімшілік құқық бұзушылықтар құрамының бар екендігін дәлелдеу және әкімшілік жауаптылыққа тарту туралы қорытындыларымен келіседі. Адвокаттың шағымында, прокурордың апелляциялық өтінішхатында көрсетілген дәлелдер апелляциялық сатыдағы сотпен тексерілді және дәрменсіз деп танылды, әкімшілік құқық бұзушылық жасау фактісі зерттелген дәлелдемелер жиынтығымен анық расталады.
Апелляциялық сатыға И.Қ.-ның кінәсін жоққа шығаратын немесе оған күмән келтіретіндер мән-жайлар ұсынылмады. Сот үкімін өзгеруге немесе оның күшін жоюға негіздер анықталмағандықтан қылмыстық істер жөніндегі сот алқасының 2023 жылғы 12 желтоқсандағы қаулысымен бірінші саты сотының қаулысы өзгеріссіз, апелляциялық шағым және апелляциялық өтінішхат қанағаттандырусыз қалдырылды.
Амандық САҒЫНТАЙҰЛЫ
Фото: иллюстратив