«Сенім» элитарлық мектебінде мұғалімдерге 3D принтерге техникалық қызмет көрсету бойынша шеберлік сабағы өтті, деп хабарлайды Өңірлік коммуникациялар қызметі.
Оған Атырау қаласы және Индер, Махамбет, Қызылқоға аудандары бойынша білім беру ұйымдарынан 30-дан астам ұстаз қатысты.
Информатика пәнінің мұғалімдері тегін шеберлік сабағында жоғары сапалы 3D басып шығарудың негізгі принциптерін, негіздерін, мәселелерін және оларды шешу жолдарын, принтерді пайдалану және техникалық қызмет көрсету үшін қажетті құралдардарды біліп, үйренді. Тренерлер құралдарды қолдану жолдарын егжей-тегжей түсіндірді. Нысанды кесу, тірек қою, дайын үлгілерді басып шығару жолдарын көрсетті. Мұғалімдер өздерімен бірге 3D принтерлерін алып, тренердің жетекшілігімен ондағы техникалық ақауларды түзетуге мүмкіндік алды.
Шеберлік сабағы JasUP жобасы аясында, Radiomart компаниясының мамандары мен Атырау облысындағы білім беру ұйымдарының мұғалімдері арасында 3D принтермен жұмыс істеу дағдырларын қалыптастыру мақсатында өткізілді.
JasUP жобасы «Теңізшевройл» әлеуметтік инвестициялық бағдарламасы аясында жүзеге асырылады және Атырау облысындағы 13 пен 24 жас аралығындағы жастардың техникалық дағдыларын жетілдіруге бағытталған.