Қой зауытының асыл тұқымды қойларын ұрлаған күдіктіні әшекерелеген тергеушіге алғыс білдірді, деп хабарлайды AtyrauPress тілшісі.
Қызылқоға аудандық полиция бөліміне ірі мөлшерде асыл тұқымды 307 бас қаракөл қойы ұрланды деп қой зауытынан арыз түскен. Аталған дерек бойынша қылмыстық іске қатысты тергеу жұмыстары жүргізіліп, күдікті ұсталған. Тергеу амалдары нәтижесінде аталған мекемеге 12 280 000 теңге материалдық шығын келіп, өндіріліп алынды.
- Тамыз айында асыл тұқымды 307 бас қаракөл қойлары ұрланған болатын. Аудандық полиция бөлімінің аға тергеушісі Бауыржан Жауқаш қылмысты ашу үшін жедел-тергеу амалдарын жүргізіп, сот-тауарлық, экономикалық сараптамаларды тағайындап, жоғары деңгейде кәсіби білімділігін көрсетті. Қылмыстық жолмен келтірілген 12 280 000 теңге материалдық залалды өндіруге септігін тигізді. Осыған орай, Қызылқоға аудандық полиция бөлімінің аға тергеушісі Бауыржан Жәнібекұлы Жауқаштың қылмыстық істі тексеру барысында өз қызметіне жауапкершілікпен қарағаны үшін өз ризашылығымды білдіремін, - деді қой зауытының директоры.
Бүгінде полиция саласында білікті сала мамандарының біліктілігі арқасында көп тұрғын күрмеулі мәселесін оңай шешуде. Кез-келген қылмыстың жолын кесу – тәртіп сақшыларының табандылығы мен кәсібилігінің жемісі.
Амандық САҒЫНТАЙҰЛЫ
Басты фото: иллюстрация
