Атырауда «Фариза және ақын сіңлілері» атты поэтикалық кеш өтті, деп хабарлайды AtyrauPress тілшісі.
Әдеби кеште еліміздің әр өңірінен келген ақындар бас қосты. Олардың арасында филология ғылымдарының кандидаты , Махамбет және Төлеген Айбергенов атындағы сыйлықтардың лауреаты Оңайгүл Тұржан мен "Өң мен түс", "Жүз өлең" жыр жинақтарының авторы, ҚР Мәдениет саласының үздігі Гүлманат Әуелхан бар. Іс-шара Фариза Оңғарсынованың туғанына 85 жыл толуына орайластырылған. Бұл туралы Өңірлік коммуникациялар қызметі мәлім етті. Ақындар Фариза Оңғарсыноваға арналған жүрек жарды жырларын оқып, естеліктерімен бөлісті. Сондай-ақ, кеште ақынның сөзіне жазылған әндер шырқалып, поэзиямен ұштасқан театрландырылған қойылым көптің қошеметіне ие болды.
⁃ Бұл тек бір ақынның мерейтойы ғана емес, сонымен қатар қазақ поэзиясының ұлы мерекесі. Фариза апамыз тек ақын емес, ұлттық рухтың, әйел болмысының, шындық пен әділдіктің символы. Біз ұлы тұлғаларымыздың мұрасын сақтау мен насихаттауға әрқашан үлес қосуға дайынбыз. Бұл кеш жастарымызға өнеге, ұрпаққа ұлағат, - деді облыс әкімінің орынбасары Дарын Шамұратов.
Мәдени іс-шара облыс әкімдігінің қолдауымен, Қазақстан Жазушылар Одағының ұйымдастыруымен өткенін айта кетейік.
Сәуле МАҒАУ