Республикалық «Қола домбыра» оқушылар айтысының облыстық кезеңі өтті. Атырау облыстық білім беру басқармасының балаларға қосымша білім беру оқу-әдістемелік және ғылыми-практикалық орталығы ұйымдастырған жыр додасына 8 оқушы қатысты, - деп хабарлайды Өңірлік коммуникациялар қызметі.
Үздік атанған ақын 1 қарашада Астанада өтетін республикалық жыр бәйгесінде облыс намысын қорғайды.
- Бұл жарыс жас ақындарға тәжірибе жинақтап, өздерінің таланттарын танытуға үлкен мүмкіндік береді, сондай-ақ қазақтың бай ауыз әдебиетін сақтауға, оны дамытуға үлес қосады. Бүгінгі сайыста облысқа танымал ақындар қазылық етті, - деді оқу-әдістемелік орталығының бөлім басшысы Дулат Далиев.
Қазылар алқасының шешімімен бас жүлде Н.Тілендиев атындағы кіші өнер академиясының 11-сынып оқушысы Марсель Ерсайыновқа бұйырды.
- Бүгінде үлкендерге – «Алтын домбыра», студенттерге – «Күміс домбыра» , оқушыларға – «Қола домбыра» айтысы ұйымдастырылып жүр. Бұл біз үшін үлкен мүмкіндік. Алдағы үлкен додада Атырау облысының намысын қорғау мен үшін үлкен мәртебе, - деді М.Ерсайынов.