Атырауда мемлекеттік-әлеуметтік тапсырыс аясында облыстық ішкі саясат басқармасы жанынан Атырау қаласының этнос өкілдері үшін жаңа шығармашылық - «Этно әлем» оқу орталығы ашылды, деп хабарлайды AtyrauPress тілшісі.
Мемлекет басшысы Қасым-Жомарт Тоқаевтың тапсырмасын іске асыру, ұлтаралық келісімді нығайту және ұлт өкілдерінің ел мәдениетімен біте қайнасуына бағытталған жаңа жоба ағымдағы жылдың соңына дейін жалғасады.
«Этно әлем» оқу орталығының ашылуына өңірдің зиялы қауым өкілдері, Қазақстан халқы Ассамблеясы мүшелері, мәдениет және спорт саласының өкілдері қатысты. Олар бір ауыздан облыста ашылып жатқан жаңа шығармашылық орталықтың ұлттық дәстүрді жаңғырту мен ұлттар арасындағы достықты нығайтудағы бастаманы қолдады.
- Қазақ халқының байырғы атамұрасын өскелең ұрпаққа дарыту, этностардың қазақ мәдениетімен кең тыныстануына мүмкіндік беретін бұл жоба қатысушылардың көңілінен шығады деп үміттенемін. Үйірмелердің тегін болуы, этнос өкілдерінің төл дәстүрімізбен жақынырақ танысуы керемет бастама. Барлық үйірмелердің жетекшілеріне табыс тілеймін. Алар асуларыңыз биік болсын, - деді ашылу рәсімінде сөз сөйлеген Атырау облысының Құрметті азаматы, Х.Досмұхамедов атындағы Атырау университетінің профессоры Бақтыбек Таубаев.
«Этно әлем» оқу орталығы 7 мен 70 жас аралығындағы кез келген этнос өкілі үшін алты бағыт бойынша тегін үйірмелерді ұсынады. Мұнда домбыра тарту, дәстүрлі ән айту, садақ ату, құрақ құрау, киіз басу және қазақ күресінен сабақтар өтеді.