Атырауда ет бағасы қымбаттамаса, арзандар емес. Әсіресе, кешегі Наурыз мейрамы кезінде базарларда сиыр еті 3,5 мың теңгеден асып түсті, деп хабарлайды AtyrauPress тілшісі.
Ал, республикалық БАҚ шаруалардың жетістіктері туралы жарыса жазуда. Өткен жылы Атырау облысында ет өндірісі 50,1 мың тоннаға жетіп, 5%-ға артты. Ендеше, ет неге қымбаттады?
Өз кезегінде жергілікті фермерлер де қарап отырған жоқ. Олар малды бордақылау технологиясын сәтті меңгеріп, бұқалардың «тірідей салмағының» артуына қол жеткізіп отыр.
– Менің ойымша, барлық фермерлер бордақылау алаңдарын салуы керек. Бұқалар қатты арықтап, "мүйізі мен тұяғы ғана қалатын" жағдайға жеткенше күтудің қажеті жоқ. Біз барлық малды – қойларды, бұқаларды, жылқыларды бордақылау алаңында ұстаймыз. Халық сапалы ет жеуі керек деп есептеймін. Бағаның қымбаттау себептерінің бірі – мейрам алдында көптеген малды Өзбекстаннан келген алыпсатарлар сатып алды, - дейді Махамбет ауданындағы «Дастан» шаруашылығының басшысы Қоныс Ерманов.
Бордақылау алаңдарын ашу саясаты өзін-өзі ақтады. Алайда, наурыз айындағы сиыр етінің қымбаттауы Ауыл шаруашылығы министрлігінің бағаны тұрақтандыруға бағытталған күш-жігерін жоққа шығара жаздады.
Әйтсе де, бағаның өсуіне бәрі бірдей алаңдап отырған жоқ. Мәселен, Қоныс Ерманов ет бағасының қымбаттауы ауыл шаруашылығының дамуына оң әсерін тигізетінін айтады.
– Бордақылау алаңындағы малды әрқашан сатуға болады, ал, далада жайылатын сиырлар суықта май жоғалтады, сондықтан өткізу қиындайды, – дейді ол.
Сәуле МАҒАУ
Фото: pixabay