Ауданда көктемгі тасқынға қарсы алдын алу шаралары жүйелі түрде жүргізіліп, су тасқынының алдын алу мақсатында қарқынды дайындық жұмыстары қолға алынуда. Табиғаттың тосын мінезіне төтеп беру үшін аудан басшылығы тиісті мекемелермен бірлесіп, қауіптің алдын алу бағытында нақты қадамдар жасауда, деп хабарлайды AtyrauPress тілшісі.
Аудан әкімі Қанат Қадыржанұлының басшылығымен өткен әкімдік отырысында аудандық электрмен қамту орталығына маңызды тапсырмалар жүктелді. Бұл туралы аудандық әкімдік мәлім етті. Атап айтқанда, Ойыл өзені «Кенен» көпірі маңында орналасқан электр бағаналарының су шайып кету қаупін болдырмау мақсатында оларды бекіту және нығайту шаралары жедел жүзеге асырылуы тиіс болды. Осыған сәйкес, апта ішінде аудандық электрмен қамту орталығының мамандары арнайы техникалардың көмегімен қауіп төнген аумақтардағы электр бағаналарын көтеріп, олардың түптерін нығайтты. Нығайту жұмыстары барысында құм толтырылған қапшықтармен бекіту жұмыстары жүргізіліп, электр желілерінің тұрақтылығы қамтамасыз етілді.
Сонымен қатар, ауданға қарасты Көздіғара ауылдық округінің маңында орналасқан тоқ көзін реттеуші қосалқы станция айналасына толықтай бөгет тұрғызылып, тасқынға қарсы қоршау шаралары атқарылды. Бұл жұмыстар электр қуатының үздіксіз берілуіне кепілдік беріп қана қоймай, төтенше жағдайлардың алдын алуға бағытталды.
Айта кетейік, бұған дейін облыс әкімінің орынбасары Қайрат Нұртаев және облыстық төтенше жағдайлар департаменті бастығының орынбасары, подполковник Ратбек Демеуберген арнайы іссапармен ауданға келіп, Сағыз және Ноғайты өзендерінің арналарын кеңейту және тереңдету, сондай-ақ елді мекендердегі бөгеттерді биіктету жұмыстарымен танысып, тексеріп шықты. Бұдан бөлек, Миялы ауылындағы «Қарасу» бойына салынған көпірдің, Ойыл мен Көздіғара өзендері бойындағы көпір құрылыстарының және су шайған «Сағыз-Миялы-Қарабау» тас жолындағы жөндеу жұмыстарының сапасына баға берілді.
Аудан әкімі Қанат Қадыржанұлының айтуынша, көктемгі су тасқынының алдын алу мақсатында аудан бойынша 41 200 метр бөгетті нығайту жоспарланған, оның 90 пайызы бүгінде аяқталған. Бұзылған екі көпір қалпына келтіріліп, жаңадан бір көпір салынды. Сонымен қатар, «Сағыз-Миялы-Қарабау» тас жолында судың кедергісіз өтуі үшін 14 су өткізгіш орнатылды.
Сапар барысында облыс әкімінің орынбасары ауданға қарасты Қарабау ауылына табан тіреп, аталған округ арқылы өр суы өтетін каналдың бүгінгі жай күйімен танысты. Бұл тұрғыда аудан басшысы талапқа сай келмейтін каналдың су өткізу қабілетін арттыру қажеттігін атап өтті.
Қазіргі таңда мамандар мен жауапты органдар көктемгі тасқынға дайындықты күшейтіп, су тасқыны қаупін барынша азайту үшін жұмыс жүргізуде.
Амандық САҒЫНТАЙҰЛЫ