Атырауда қоршаған ортаға зиянды ластаушы заттар шығаратын ірі кәсіпорын басшыларының қатысуымен жиын өтті, деп хабарлайды ATPress.kz
Атырау облысы әкімінің орынбасары Ержан Әбілхановтың төрағалығымен өткен жиын барысында, қаланы көгалдандыру мәселесі талқыланды.
- Атырау облысы әкімдігі ҚР Президенті Қасым-Жомарт Тоқаевтың елді жаппай көгалдандыру туралы тапсырмасын іске асыру мақсатында, Атырау қаласы мен оның айналасында ағаш отырғызу бойынша 10 жыл жүзеге асырылатын іргелі жоба дайындады. Ол көгалдандыруға арналған учаскелерді, жауапты орындаушыны және ағаш отырғызу кестесін айқындауды көздейді, – деді Ержан Әбілханов
Аталған жобаны жүзеге асыру үшін инвесторлар қажет. Осы орайда облыста ауаға негізгі қалдық шығарушы мұнай-газ өндіру және мұнай өңдеу кәсіпорындарын тарту көзделіпті. Осыған байланысты, "ластаушы қалпына келтіреді" қағидасына сәйкес ТШО, НКОК, ЕМГ, АМӨЗ және басқа да негізгі кәсіпорындар инвестор ретінде анықталған. Аталған кәсіпорындарға көгалдандыру және 3-5 жыл бойы алғашқы күтім жасау үшін учаскелер бекітілмек.
Жиынға қатысқан мұнай-газ секторы компанияларының басшылары және өзге де компания өкілдері жобаны жүзеге асыруға бейілді екендіктерін жеткізді. Жуық арада меморандумға қол қойылып, жұмыс басталмақ.
- Бұл жобаны іске асыру жалпы аймақтағы экологиялық ахуалды жақсартады, қала тұрғындары үшін жаңа демалатын және серуендейтін орындар пайда болады деп сенемін. Сондай-ақ көп ұзамай біз тек «Атырау» емес, «Жасыл Атырау» деп айтатын күнге жетеміз деп ойлаймын!, – деді облыс әкімінің орынбасары.
ATPress.kz