Атырауда «Emerson» аталатын шетелдік компанияда әр салада қолданылатын қысым датчиктерін шығаратын цех іске қосылды, деп хабарлайды Өңірлік коммуникациялар қызметі.
Салтанатты іс-шара өндірістік орталықтың қауіпсіздік ережелерін таныстырудан басталды. Цехтың ашылу салатанына «Эмерсон», «Теңізшевройл» компанияларының өкілдері мен Индустриалдық-инновациялық даму басқармасынан және «Атамекен» ұлттық кәсіпкерлер палатасынан басшылар қатысты.
- Қазақстанда Эмерсон өнімдерін өндіруді қолға алып жатырмыз. Бүгінгі өндірістің ерекшелігі – жаңа технологияларды қолданып, қазіргі нарықтың ең алдыңғы қатардағы жабдықтарды шығаруында. Мұндай істің облысымызда қолға алынғаны әрине, қуантарлық жағдай. Қазір бұл цехта жергілікті үш адам жұмыспен қамтылды. Алдағы уақытта тағы да өңір тұрғындарын жұмыспен қамту жоспарлануда, - деді Индустриалдық-инновациялық даму басқармасы басшысының міндетін атқарушы Қарлығаш Бекбаева.
Салтанатты жиынның лента қию рәсімі «Emerson» компаниясының президенті Нита Джонға, аталған компанияның Еуропадағы операциялар жөніндегі вице-президент Буу Герхардқа, Шығыс Еуропадағы операциялар жөніндегі вице-президенті Сучомски Славомирге, ТШО-ның Қазақстандағы бас директорының орынбасары Көңілқош Сүйсіновке, сондай-ақ компания қызметкерлері Тревис Мак Дермоттқа, Константин Миллерге, Деннис Сима мен Скотт Вуденге жолданды.
Цехтың салтанатты лентасы қиылған соң, орталықтың ішіне экскурсия жасалып, өнімнің қалай жасалатыны түсіндірілді.
- Бұл датчиктер әр түрлі салада қолданылады, яғни кез-келген құбыр арқылы өндірілетін су, май, тамақ, мұнай, дәрі-дәрмек өндірісі сияқты салаларды қамтиды. Мәселен тамақ өндірісінде, құбыр арқылы өтетін сұйық майдың қысымын операторлар дәл процесс кезінде бақылауы керек, сол жұмыс осы датчик арқылы жүзеге асады. Сонымен қатар бұл датчикті жасау барысында құрылымы 13 компьютерден өтіп, соңғы нұсқа тексеріске жіберіледі. Әзірге мұнай саласынан бір ғана компаниядан тапсырыс алып бастадық, алдағы уақытта әртүрлі саладан тапсырыстар қабылдап, экспортқа шығамыз деген ойдамыз, - деді цехты таныстырушы маман Берік Жұмағалиев.