2025 жылдың 5 сәуірінен бастап ҚР бойынша мопедтер ресми түрде механикалық көлік құралдарына теңестірілді, деп хабарлайды AtyrauPress тілшісі.
Осыған байланысты тіркелмеген мопедтерді немесе оларды жүргізуші куәлігінсіз пайдалануға тыйым салынады. Бұл туралы Атырау облысы ПД Әкімшілік полиция басқармасы процессингтік орталығының бастығы Жеңіс Дәулетов Өңірлік коммуникациялар қызметі алаңында өткен брифинг барысында мәлім етті.
- Бұл өзгеріс 2024 жылғы 3 қазанда қабылданған «Қазақстан Республикасының кейбір заңнамалық актілеріне жекелеген көлік құралдары түрлерінің жүруін ұйымдастыру және жол қауіпсіздігін цифрландыру мәселелері бойынша өзгерістер мен толықтырулар енгізу туралы» заң аясында жүзеге асырылуда. Осы заңның 41-бабына сәйкес қозғалтқышының көлемі 50 текше сантиметрден аспайтын немесе электр қозғалтқышпен жабдықталған, ең жоғары конструктивтік жылдамдығы сағатына 50 км/сағ-тан аспайтын екі немесе үш дөңгелекті механикалық көлік құралдары мопед ретінде танылып, олар мокиктерге, скутерлерге және осыған ұқсас сипаттамалары бар басқа да механикалық көлік құралдарына теңестірілді,- деді Жеңіс Дәулетов.
Бүгінде облыс бойынша 44 мопед ресми тіркеуге алынды. 5-ші сәуірден кейін тіркелмеген мопед жүргізушілеріне әкімшілік құқықбұзушылық туралы кодекстің 612- бабындағы «Көлік құралын жүргізу куәлігі жоқ күйінде тізгіндеу» және 590-бабы 2-тармағына сәйкес «Мемлекеттік белгісі жоқ күйде басқарғаны үшін» әкімшілік жауапкершілікке тартылады.
Сәуле МАҒАУ