Павлодарда ер адамды емдеуде салғырттық танытып, өліміне әкелген соң медицина мекемелері сот шешімімен марқұмның қызына 5 миллион теңге өтемақы төлейтін болды, деп хабарлайды Оrda.kz Жоғарғы сотқа сілтеме жасап.
2023 жылдың 16 ақпанында 56 жастағы ер адамды жедел жәрдем Павлодар қаласының №3 қалалық ауруханасына жеткізді. Алайда, оны ауруханаға жатқызудан бас тартылды. Алдағы екі апта бойы ол Павлодар қаласындағы түрлі медициналық мекемелерге бірнеше рет жүгініп, «Almaz Medical Group», облыстық аурухана, емхана және №1 қалалық ауруханадан көмек сұрады. Дәрігерлер әртүрлі диагноздар қойды: алдымен «бронхит», кейін «өткір панкреатит» және «өт жолдарындағы тастар мен холецистит».
Алайда, емдеу еш нәтиже бермей, 12 наурызда науқас қайтыс болды.
Алдын ала тергеу органдары медицина қызметкерлеріне қатысты істі құқық бұзушылықтың болмауына байланысты тоқтатқан болатын. Дегенмен, марқұмның қызы Павлодар қалалық сотына әкесінің қайтыс болуына әкеп соқтырған медицина қызметкерлерінің салғырттығы үшін моральдық шығын ретінде 10 миллион теңге өтемақы талап етіп, арызданды.
Бірінші сатыдағы сот, медициналық көмектің сапасыз көрсетілгенін сот-медициналық сараптаманың қорытындысы және дәрігерлерге қатысты тәртіптік шаралардың қолданылуы растағанына қарамастан, талапты мақұлдаудан бас тартты. Апелляциялық сот науқастың денсаулығының нашарлауы тиісті күтім мен қажетті диагностикалық және емдеу шараларының жүргізілмеуінен орын алғанын ескеріп, бұл оның өліміне және туыстарының айтарлықтай азап шегуіне алып келгенін анықтады.
Апелляциялық инстанция талапты ішінара қанағаттандырып, Павлодар медициналық мекемелерінен моральдық зиян ретінде 5 миллион теңге өндіріп алу туралы шешім шығарды. Соттың қаулысы заңды күшіне енді.
Фото freepik