Бүгін Атырау қаласында «Таза Қазақстан » жалпыұлттық экологиялық акциясы аясында 26-шы сенбілік өтті, деп хабарлайды AtyrauPress тілшісі.
Сенбілікке «АМӨЗ», «ЕмбіМұнайГаз», «KPI» сынды өңіріміздегі ірі мұнай компанияларының 250 қызметкері атсалысты.
"Жайықтың жағасынан Атырау облыстық ауруханасына дейінгі аумақта тазарту жұмыстарын жасаудамыз. Осы мақсатта «АМӨЗ» зауытынан екі экарус адам келдік. Атырау өңірін экологиялық таза аймақ ретінде сақтау әр тұрғынның өзінен басталады деп ойлаймын. Халықты тазалыққа шақырамыз» дейді «АМӨЗ» зауытының қызметкері Жәңгірхан Нұрышев.
Авангард ықшамауданы мен Атырау облыстық ауруханасы аумағына дейінгі аралықта өткен сенбілікте 10 тоннадай қоқыс шығарылып, 2 техника жұмылдырылды.
Еске сала кетейік, өңірде «Таза Қазақстан » акциясы басталғалы, тазалық жұмыстарына 62 439 адам қатысып, 1726 тонна қоқыс шығарылды. 1477 техниканың күші пайдаланылды. Сонымен қатар елімізде @TAZAQAZBOT телеграмм чат-боты іске қосылған. Бұл чат арқылы кез келген тұрғын экологиялық мәселелерге қатысты сұрағын, фото, видео түріндегі ақпаратты жолдай алады.
Айгерим Талғатқызы