Атырауда жұмысқа орналастырып беремін деп 40 адамды алдаған күдікті ұсталды, деп хабарлайды AtyrauPress тілшісі.
Атырау облысы полиция департаменті Криминалдық полиция басқармасының қызметкерлері қаңтар-наурыз айларында тұрғындарды жұмысқа орналастырып беремін деп алдап, қомақты ақша қаражатын жымқырған 1988 жылы туған күдіктіні анықтап, ұстаған. Күдікті тұрғындарды ірі мұнай компанияларына жұмысқа орналастырамын деп әр адамнан 100-150 мың теңге көлемінде ақша қаражатын алып отырған. Нәтижесінде 40-қа жуық қала тұрғынының 4 млн-ға жуық теңгесін алаяқтық ниетпен қолды қылған.
Аталған факті бойынша 1988 жылы туылған күдіктіге қатысты ҚР ҚК-нің 190-бабы 3-бөлігіне сәйкес қылмыстық іс қозғалып, тергеу әрекеттері жүргізілді. Қазіргі таңда күдікті өз кінәсін толықтай мойындап уақытша ұстау изоляторына қамауға алынып, 40 эпизодты қылмыстық іс сотқа жолданды.
Амандық САҒЫНТАЙҰЛЫ