"Шаңырақ" балалар үйінде не болған? (+ВИДЕО)
Атыраудағы "Шаңырақ" балалар үйіндегі жағдайға қатысты облыстық полиция департаменті түсінік берді, деп хабарлайды AtyrauPress тілшісі.
"Қазіргі таңда әлеуметтік желіде таралған балалар үйіндегі деректерге қатысты ҚР Қылмыстық кодексінің 140-бабы 1 бөлігімен сотқа дейінгі тергеу амалдарын жүргізуде. Өзге ақпарат ҚР ҚПК-нің 201-бабына сәйкес жариялауға жатпайды" деп мәлімдеді департаменттің баспасөз қызметі.
Ал, желіде жергілікті блогер Нұрлан Жунасовтың балалар үйіне барып түсірген бейнежазбасы жүр. Онда директор мұның бәрі бұрынғы қызметкердің тірлігі екенін айтады. Балалардың өздері де ешқандай зәбір көрмегендерін айтуда.
Еске сала кетейік, «НемолчиKZ» қорының жетекшісі Дина Таңсәрі өзінің Facebook парақшасында атышулы жазба жариялаған болатын. Қор жетекшісінің айтуынша, балалардың бірі 9-16 жас аралығында қатты таяқ жеп, сенім телефонына хабарласқан. Комиссия келгенімен, ешқандай заңбұзушылық анықтамаған. Оның үстіне, комиссия балалар үйін директордың өзі тексеру керегін айтады. Алайда, балалардың арыз-шағымына құлақ аспайды. Бес жастағы бүлдіршін де соққыға жығылған, бірақ мұны ешкім видеоға түсірмеген.
«Балалар кімге сеніп тапсырылған? Неліктен Атыраудан арыз көп түседі? Интернатта, ерекше балалар бақшасында, енді балалар үйінде де осындай жағдай орын алуда. Білім беру департаменті қайда қарап отыр? Бәрін қызметтен босату керек, әйтпесе, қылмысты жасыру бізді жаппай агрессияға әкеліп соқтыруда!» дейді жазба автор.
Амандық САҒЫНТАЙҰЛЫ