Атырауда 2 мыңға жуық ит ауланды (+ВИДЕО)
Атырау қаласының ит аулау қызметі тұрғындардың шағымдары бойынша жұмыс жасауда, деп хабарлайды AtyrauPress тілшісі.
– Біз облыс әкімдігінің «109» бірыңғай байланыс орталығына түскен шағымдар бойынша ит аулаймыз. Ауланған иттің жартысына жуығы жаңа иелерін тапты. Ал, 150-ге жуығы стерилизация, вакцинациялау және чиптеуге жіберілді. Қалғаны адамға шабуылдағандықтан және ұйығып жүргендіктен облыстық мәслихат шешімінің 25-тармағына сәйкес залалсыздандырылуға жатқызылды, - дейді Атырау қаласының ит аулау қызметінің басшысы Исатай Оразғалиев.
«109» бірыңғай байланыс орталығының ауысым жеткшісі Регина Ғұмарованың айтуынша, орталыққа түсетін шағым көп.
«Жыл басынан бері мұнда бір ғана ит мәселесі бойынша 1300 шағым түсті. Ал, күн сайын 70-80 арыз қабылданып отырады. Оларды арнайы кулл-оператор тіркейді. Кейін диспетчер шағым бойынша шара алу үшін ветеринариялық стансаға хабарлайды. Артынша шара алынды ма, жоқ па, сол тексеріледі, дейді ол.
Айта кетейік, «109» орталығы тәулік бойы тұрғындардан шағым қабылдайды. Ит аулау мәселесі бойынша да осы орталыққа хабарласуға болатынын оқырмандардың қаперіне береміз.