Мемлекет басшысы Қасым-Жомарт Тоқаев "Әділетті Қазақстан: құқық тәртібі, экономикалық өрлеу, қоғамдық оптимизм" атты Қазақстан халқына Жолдауында ел ертеңі үішн маңызды мәселелерді көтеріп, батыл бастамаларды ұсынды.
Президент тапсырмасымен «Жайлы мектеп» ұлттық жобасы жүзеге асырылуда. 2025 жылдың соңына дейін жоспарға сәйкес заманауи үлгідегі 217 мектеп пайдалануға берілмек. Бұл өте маңызды жұмысты «Самұрық-Қазына» қоры қадағалап отыр. Демек, Үкімет пен әкімдер бұл шаруаға белсене атсалысуға тиіс, депутаттар да бұл істен шет қалмай бақылауда ұстауы керек деген сөз. Үкімет жайлы мектептерде арнайы басқару жүйесін енгізуді ойластыруы керек. Сонымен бірге, еліміздегі 1300 мектепке күрделі жөндеу жүргізіледі. Үкімет, әкімдер қаржыландыру көздерін анықтап, демеушілерден де қаражат тартып, үш жылда толық жаңарту аяқталады деп күтілуде.
Айта кетер жағдай, мемлекет кепілді төлемдер үшін қыруар қаражат бөліп отыр, ол жекеменшік мектептерге де бөлінді. Мысалы, 250 мыңнан астам бала оқитын жекеменшік мектептерге биылдың өзінде бюджеттен 134 миллиард теңге бөлінген. Ата-аналар мемлекеттің жекеменшік мектептерге нақты көмек беріп жатқанын біліп отырғаны жөн. Әр балаға норматив бойынша бөлінген қаражаттың көрсетілуі ашық болуы шарт. Азаматтар әлеуметтік бағдарламаларға бөлініп жатқан қаржы туралы шынайы ақпараттан хабардар болуы керектігін ескертті Президент. Бұл мәліметтер неғұрлым халыққа қолжетімді болса, соғырлым қоғам сауатты болады және қаржы мақсатты жұмсалалатын болады.
Жамиға ТАҢАТАРОВА,
тарих ғылымдарының докторы