Арнайы мамандармен Атырау қаласының ауасына түнгі мониторинг жүргізіліп, күкіртсутегі мен көмеірсутегінің шекті мөлшерден асып кеткендігі анықталды, деп хабарлайды ATPress.kz
Атырау облысы бойынша экология департаментінің ұйымдастыруымен өткен түнгі мониторингке Атырау облысы бойынша табиғат қорғау прокуратурасының өкілі, «Қазгидромет» РМК Атырау облысы бойынша филиалының маманадары қатысқан болатын. Мониторингтік топ өз жұмысын сағат 21.00-де Әуезов көшесі бойындағы, Атырау облысы бойынша Мемлекеттік кірістер департаменті (салық департаменті) ғимаратының алдында орналасқан айналма жолдың тұсында ауа сынамасын алудан бастады. Әп дегеннен, қаланың көпқабатты тұрғын үйлері моланынан шоғырланған бұл маңайдағы сынама күкіртсутегінің рұқсат етілген шекті концентрациядан 30 есе асып кеткендігін көрсетті.
Жалпы, мониторингтік топ бұл түні қаланың 6 жеріне барған болатын. Соның төртеуінде нормадан ауытқушылық тіркелді. Оның ішінде жоғарыда аталған Әуезов көшесіндегі айналма жолдың тұсынан бөлек, Мирный ауылында 8 есе, Исатай-Махамбет орталық алаңында 20 есе күкіртсутегінің рұқсат етілген шекті концентрациядан асып кеткендігі анықталды. Ал, «Мұнайшы» стадионы маңында көмірсутегі мөлшері рұқсат етілген шекті концентрациядан 2,5 асып кеткен.
- Желдің бағыты оңтүстік- шығыстан соғып тұр. 2 және 8 метр секундына жылдамдығын құрап тұр. Күкіртсутегісінің көлемі үлкен көрсеткішті көрсетіп отыр. Нақты қайдан екенін айта алмаймыз. Себебі, қазір тек мониторинг жұмыстарын жүргізіп отырмыз. Әлі камеральды бақылау жасауымыз керек. Бұған және сараптамлық та жұмыстар жүргізілуі тиіс. Одан кейін оны картаға салып, қай жақтан соғуы мүмкін, бағыттарын қарауымыз керек. Екінші нүктеміз Атамбаев көшесіне келіп отырмыз. Бұл жерде де желдің бағыты оңтүстік- шығыстан соғып тұр. Бірақ, бұл заваодтан да емес, ТЭЦ-тан емес. Бұл жер таза деп те айтуға болады, – деді «Қазгидромет» РМК Атырау облысы бойынша филиалы басшысының орынбасары Жолдасқали Телагисов.
Оның сөзіне қарағанда, рұқсат етілген шекті концентрациядан шығу фактілері кей кездері күніне бірнеше мәрте орын алады екен. Әсіресе, таңға жақын тіркелетін жағдайлар да бар көрінеді.
Түнгі мониторинг жұмыстарының қорытындысында Атырау облысы бойынша экология департаментінің ресми өкілі Аслан Жеңісұлы алынған сынамалар бұдан әрі зерттелуге жөнелтілетінін, қорытындылары бойынша тиісті құзыретті орындарға сәйкесінше құжаттамалар жіберілетінін айтты. Сонымен, қатар, соңғы әзірде ауаның ластануына қатысты тұрғындардың арыз-шағымдарының көбейіп кетуіне орай, тұрақты өткізіліп келетін мониторинг жұмыстары енді бұрыңғысынан бетер жиілейтінін тілге тиек етті.
Қаршыға Көшеков
Фото мен бейнетүсірілім автдордыкі